2013-12-26 ვწერ თავისუფალ თემას ვწერ თავისუფალ თემას
მაკა ყიფიანი
21 დეკემბერს, თბილისის კლასიკურ გიმნაზიაში (დირექტორი — ამირან ჯამაგიძე) კონკურსის — „ვწერ თავისუფალ თემას“ გამარჯვებულების დაჯილდოების ცერემონია გაიმართა. კონკურსი, რომლის ინიციატორია თბილისის კერძო სკოლა „ლოგოსის“ დირექტორი — გია მურღულია, განსაკუთრებული ნიჭით დაჯილდოებული უფროსკლასელებისთვის, სამ ეტაპად ჩატარდა თბილისის კლასიკურ გიმნაზიასთან პარტნიორობით.
როგორც კონკურსის ინიციატორმა, ბატონმა გია მურღულიამ განაცხადა, სულ მალე გამოიცემა კონკურსში მონაწილეთა საუკეთესო თხზულებების კრებული, რომელიც უფასოდ გადაეცემა წარმატებულ მონაწილეებს, მათ პედაგოგებსა და სკოლებს.
მონაწილეებს შეთავაზებული თემებიდან უნდა აერჩიათ ერთი. წარმოდგენილ თემებს შორის იყო: „ცხოვრების საზრისის პრობლემა ლიტერატურაში“; „სიყვარული პოეზიაში“; „ქართული იდეა — „ჩვეულებისაებრ მამულისა სლვა“; „ის, რაც განსაკუთრებით დამამახსოვრდა ბიბლიიდან“; „ნახატი, რომელიც მანცვიფრებს“; „რატომ ფილოსოფოსობენ ადამიანები?“; „საქართველოს ისტორია — 7 ყველაზე მნიშვნელოვანი მოვლენა“; „ადამიანის ევოლუცია — პროგრესი თუ დეგრადაცია?“; „საქართველო — ევროპა თუ აზია?“; „ძალადობა კინოფილმებში — რატომ მოსწონთ ეს ადამიანებს?“; „ადამიანი, რომელიც თამაშობს“ და სხვ.
კონკურსის ჟიურის შემადგენლობაში შედიოდნენ საზოგადოებისთვის ცნობილი და შესაბამისი პროფილების აღიარებული სპეციალისტები, მწერლები, ლიტერატორები, პედაგოგები: ჟიურის თავმჯდომარე — გია მურღულია. ჟიურის წევრები: თამაზ ტყემალაძე, ლევან ბრეგაძე, ამირან ჯამაგიძე, ლალი დათაშვილი, ფატი ფირუაშვილი, პაატა ნაცვლიშვილი, მაია ჯალიაშვილი, გია ალიბეგაშვილი, ცირა ბარბაქაძე, ქეთი გზირიშვილი, ფიქრია ხმალაძე, ეკა კვიციანი.
დაჯილდოების ცერემონიაზე, კონკურსის ფინალურ ეტაპზე მონაწილეობისათვის, კონკურსანტებს გადაეცათ სერტიფიკატები. მიღწეული წარმატებისათვის სპეციალური სიგელები გადაეცა 16 მოსწავლეს, ხოლო კონკურსის ხუთი გამარჯვებული სპეციალური დიპლომებითა და ფასიანი პრიზებით დაჯილდოვდა.
გია მურღულია: „კონკურსი „ვწერ თავისუფალ თემას“ განკუთვნილია ჰუმანიტარული ნიჭით დაჯილდოებული მოსწავლეებისთვის. ჩემი ინიციატივით უკვე მეოთხედ ჩავატარეთ, ამჯერად, თბილისის კლასიკურ გიმნაზიასთან პარტნიორობით. მინდა აღვნიშნო, რომ ყველა ის მოსწავლე, რომელიც კონკურსში მონაწილეობდა, უკვე არის კარგი წევრი ჩვენი საზოგადოების. კონკურსანტთა უმეტესობამ აჩვენა ძალიან კარგი ფიქრის კულტურა, ზოგიერთმა კი — შესანიშნავი კულტურა ფიქრის, რაც ძალიან მახარებს. კონკურსში მონაწილეთა თხზულებების შეფასების უმთავრესი კრიტერიუმები იყო: ზოგადი განათლების მაღალი დონე, ორიგინალური და კომპლექსური აზროვნება (რაც გულისხმობს „ფიქრის მოძრაობას“ მთელ „ჰუმანიტარულ ველზე“); წერის კულტურა; ანალიზისა და შეფასების გამორჩეული უნარი; მრავალმხრივი ხედვისა და ინტერპრეტაციის უნარი. რაც შეეხება კონკურსის შინაარსს: მონაწილეებს მიცემული ჰქონდათ ათი სათაური, რომელიც ეხებოდა, ლიტერატურას, ისტორიას, ხელოვნებას, ფილოსოფიას, შემოქმედებითი ამოცანის გადაწყვეტას. კონკურსანტებს უნდა შეერჩიათ ამ ათიდან ერთი და დაეწერათ თხზულება (თავისუფალი თემა). ძალიან დიდი მადლობა მინდა ვუთხრა განათლებისა და მეცნიერების სამინისტროს, კერძო სკოლა „ლოგოსს“, მის გენერალურ დირექტორს გიორგი ჩავლეიშვილს, თბილისის კლასიკური გიმნაზიის დირექტორს, ბატონ ამირან ჯამაგიძეს პარტნიორობისა და მასპინძლობისათვის“.
პაატა ნაცვლიშვილი, მწერალი: „ის, ვინც კონკურსის მეორე ტურში ვერ გადავიდა, ვფიქრობ, მაინც გამარჯვებულია, რადგან მისმა სკოლამ სწორედ ის აირჩია და გამოაგზავნა ასეთ არაჩვეულებრივ კონკურსში მონაწილეობის მისაღებად. მოგეხსენებათ, ეს არ იყო კონკურსი ზუსტ მეცნიერებებში, ფიზიკაში, მათემატიკაში, ქიმიასა და ა. შ. აქ ბევრი რამ დამოკიდებული იყო გემოვნებაზე, განწყობილებაზე, ერთ ფრაზაზე, თუნდაც ერთ სიტყვაზე... ამიტომ კონკურსანტების თემების შერჩევისას შეიძლება ჟიურიმ მთლად მათემატიკური გადაწყვეტილება ვერ მიიღო. როცა კრებული დაიბეჭდება, მინდა, მკითხველი შემფასებლების მიმართ შემწყნარებელი იყოს. არათუ ხჳ-ხჳჳ კლასელების ნაწერები, არამედ ძალიან ცნობილი მწერლების ნაწერებიც კი სხვადასხვა შეფასების ობიექტი ხდება ხანდახან. დარწმუნებული ვარ, ის კონკურსანტები, რომლებიც ჟიურიმ გამოარჩია, მომავალში უფრო მეტ გამარჯვებას მოიპოვებენ, უფრო მეტ პრიზს მიიღებენ და ვინ იცის, შეიძლება დღევანდელი დღე მათ ინფანტილური სევდანარევი სიხარულით გაახსენდეთ“.
ქეთი კურცხალია, განათლებისა და მეცნიერების სამინისტროს ზოგადი განათლების მართვისა და განვითარების დეპარტამენტის მთავარი სპეციალისტი: „დიდი მადლობა ბატონ გია მურღულიას და კერძო სკოლა „ლოგოსს“, რომელმაც მოგვმართა ინიციატივით, ჩატარებულიყო ასეთი საინტერესო კონკურსი. ჩვენს სამმართველოში არსებული პროგრამები ძირითადად მიმართულია იქითკენ, რომ ბავშვებს მივცეთ საშუალება საგაკვეთილო პროცესის გარეთ, დამატებით აქტივობებში შეძლონ თავიანთი უნარების წარმოჩენა და შესაძლებლობების გამოვლენა რა თქმა უნდა, თანაბარ კონკურენტულ გარემოში. მიმაჩნია, რომ ასეთი კონკურსები, დამატებითი აქტივობები მოსწავლეებში ავითარებს ისეთ უნარებს, როგორიც არის: ინდივიდუალიზმის გამოვლენა, ზოგადად საკუთრი აზრის, მოსაზრებების გამოხატვა, არგუმენტირებულად მსჯელობა. ჩვენ გვსურს, კიდევ უფრო მეტი ინფორმაცია მივიღოთ სკოლებიდან, მოსწავლეებიდან, თუ რა სახის აქტივობებში სურთ მათ მონაწილეობა. მზად ვართ, ყველა თქვენ მიერ შემოთავაზებული ინიციატივა და წინადადება განვიხილოთ. კიდევ ერთხელ დიდი მადლობა კონკურსის ინიციატორებს და ყველა მონაწილეს“.
კონკურსში „ვწერ თავისუფალ თემას“ პირველი ადგილი მოიპოვა 127-ე საჯარო სკოლის მოსწავლემ, გვანცა გოგიაშვილმა: „მსგავს კონკურსში პირველად მივიღე მონაწილეობა. ძალიან ბედნიერი ვარ. გამარჯვება ჩემთვის დიდი სტიმულია. კონკურსმა საშუალება მომცა წარმომეჩინა ჩემი შესაძლებლობები. მე ავირჩიე თავისუფალი თემა: „ადამიანი, რომელიც თამაშობს“. სამწუხაროდ, დღევანდელ ცხოვრებაში ძალიან ბევრი ადამიანი თამაშობს. ჩემს მიერ დაწერილ თემაში მივმართავ ადამიანებს, თუ რა შეიძლება მოჰყვეს მათ თამაშს, მივმართავ მათ, თუ რატომ არ უნდა ითამაშონ და რატომ უნდა იყვნენ ისეთები, როგორიც სინამდვილეში არიან“.
მეორე ადგილის მფლობელი 42-ე საჯარო სკოლის მოსწავლე ელენე ჯანაძე გახდა: „ძალიან ბედნიერი ვარ. ამ წარმატებას განსაკუთრებული მნიშვნელობა აქვს ჩემთვის. ჩემი თავისუფალი თემების სახელწოდება იყო: „რატომ ფილოსოფოსობენ ადამიანები?“და „ადამიანი, რომელიც თამაშობს“. პირველ თემას მოკლედ ასე ვუპასუხე: ჩემი აზრით, ადამიანები იმიტომ ფლოსოფოსობენ, რომ ისინი ეძებენ საკუთარ თავს, აინტერესებთ რა არის ამ ცხოვრების მთავარი აზრი. რაც შეეხება მეორე თემას, ადამიანები იმიტომ თამაშობენ, რომ მათ სურთ წარმოჩინდნენ იმაზე უკეთესები, ვიდრე სინამდვილეში არიან. სამწუხაროდ, ასეთ თამაშებს არც მათთვის მოაქვს კარგი და არც მათ გარშემომყოფთათვის“.
მესამე ადგილი წილად ხვდა 136-ე საჯარო სკოლის მოსწავლეს, ლევან თაღიაშვილს: „კონკურსში მონაწილეობამ მომცა საკუთარი თავის რწმენა, უკვე ვიცი, საით უნდა წავიყვანო ჩემი ცხოვრება. ბედნიერი ვარ, რომ მომეცა საშუალება გამეცნო შესანიშნავი ადამიანები. ჩემ მიერ დაწერილ თავისუფალ თემაში „რატომ ფილოსოფოსობენ ადამიანები?“ მოვიყვანე ბერძენი ფილოსოფოსების მაგალითი, რომლებიც ეძებენ ბედნიერებას და ავხსენი, თუ როგორ უნდა იპოვოს ადამიანმა ბედნიერება ღმერთში. მეორე ტურში ავირჩიე თემა „მოთხრობის დიდოსტატი“, სადაც ვსაუბრობ ჩემს ერთ-ერთ უსაყვარლეს მწერალზე — ო’ჰენრიზე. მოცემული სამი ტექსტიდან კი ავირჩიე „შვილის პორტრეტი“, სადაც ვწერ, რომ ადამიანისთვის მთავარი სიყვარულია“.
მეოთხე ადგილი კერძო სკოლის „ინტელექტი-ხხჳ“ მოსწავლემ გიორგი მამულაშვილმა მოიპოვა: „კონკურსი „ვწერ თავისუფალ თემას“ ჩემთვის ძალიან საინტერესო და მნიშვნელოვანი აღმოჩნდა. მიხარია, რომ კონკურსის მონაწილე და ერთ-ერთი გამარჯვებული გავხდი. მივიღე დიდი გამოცდილება რაც მომავალში ძალიან გამომადგება. მსგავსი კონკურსები მოზარდი თაობის კრეატიული აზროვნების ჩამოყალიბებაში უდავოდ დიდ როლს ასრულებს. დიდი მადლობა კონკურსის ინიციატორს, ბატონ გია მურღულიას, რომელმაც თითოეულ ჩვენგანს საკუთარი შესაძლებლობების წარმოჩენის საშუალება მოგვცა. კონკურსში დავწერე თავისუფალი თემები: „საქართველოს ისტორია — 7 ყველაზე მნიშვნელოვანი მოვლენა“ და „თავისუფლება, ბედნიერება თუ სასჯელი?“
მეხუთე ადგილი კი მე-4 საჯარო სკოლის მოსწავლეს სალომე გოგიშვილს ერგო: „ჩემი პირველი თავისუფალი თემა იყო „საქართველო — ევროპა თუ აზია?“ მეორე ტურში ავირჩიე თემა „თავისუფლება, ბედნიერება თუ სასჯელი?“ ისევე როგორც ჩემს თემაში, ახლაც ხაზგასმით აღვნიშნავ, რომ თავისუფლება ბედნიერებაა. ძალიან დიდი მადლობა ჟიურის წევრებს, რომლებმაც ჩემი თემები მოიწონეს. მიხარია, რომ გამარჯვება მხვდა წილად. მსგავს კონკურსებში მომავალშიც აუცილებლად მივიღებ მონაწილეობას“.
|