2014-02-06 თავისუფალ აზროვნებაზე დამყარებული ცოდნა აბიტურიენტის ადეკვატურად შერჩევის ხერხი ესაუბრა
გვესაუბრება შეფასებისა და გამოცდების ეროვნული ცენტრის სახვითი და გამოყენებითი ხელოვნების ჯგუფის ხელმძღვანელი ნინო ხუნდაძე:
2014 წლიდან, შეფასებისა და გამოცდების ეროვნული ცენტრი, სახვითი და გამოყენებითი ხელოვნების გამოცდის დამატებით ერთიანი ეროვნული გამოცდების არჩევითი საგნების ნუსხაში, აბიტურიენტებს და ასევე უმაღლეს სასწავლებლებს საინტერესო სიახლეს სთავაზობს. ვფიქრობთ, ეს ერთნაირად საინტერესო იქნება უმაღლესი სასწავლებლების ჰუმანიტარული ფაკულტეტებისთვის და მით უფრო სახელოვნებო მიმართულებებისთვის — ეს გამოცდა სტუდენტების ადეკვატურად შერჩევაში დაეხმარება მათ. სახვითი და გამოყენებითი ხელოვნების საგამოცდო პროგრამა სრულ შესაბამისობაშია ეროვნულ საგნობრივ გეგმასთან. მასალა ეფუძნება განათლებისა და მეცნიერების სამინისტროს მიერ გრიფირებულ სახელმძღვანელოებში შესულ მასალას. ტესტისთვის სხვადასხვა ტიპის დავალებები შევარჩიეთ, რაც საშუალებას მოგვცემს, სხვადასხვა კუთხით შევამოწმოთ აბიტურიენტის ცოდნა და უნარები. ეს არ არის მარტო ფაქტობრივი მასალის ცოდნა-არცოდნის გამოცდის ტესტი, არამედ აზროვნების — რამდენად აქვს განვითარებული აბიტურიენტს თავისუფალი აზროვნების, საკუთარი თვალსაზრისის გამოხატვისა და არგუმენტირებული მსჯელობის უნარი. გამოცდის დრო სამ საათნახევარია, ტესტი 70-ქულიანია და 2 ნაწილისგან შედგება. ერთი არის ცოდნა-გაგება-გამოყენებაზე ორიენტირებული და მეორე — ანალიზი-სინთეზი-შეფასება. საგამოცდო ტესტის პირველ ბლოკში დახურული დავალებების 3 ჯგუფი იქნება წარმოდგენილი. თითოეული ჯგუფის კითხვები სახვითი ხელოვნების სხვადასხვა დარგის საილუსტრაციოდ წარმოდგენილ ერთ ან ორ ხელოვნების ნიმუშს შეეხება. ყოველ კითხვას 4 სავარაუდო პასუხი ახლავს, რომელთაგან მხოლოდ ერთია სწორი. კითხვების თითოეული ჯგუფის საილუსტრაციო მასალის შესახებ სხვადასხვა ტიპის დაახლოებით 8-10 კითხვა იქნება დასმული, რაც აპლიკანტის ცოდნისა და გამოცდილების მრავალმხრივი კუთხით შეფასებაში დაგვეხმარება (მაგ., მასალის ცოდნა (ხელოვნების ისტორია, ტერმინოლოგია, სახვითი ხელოვნების დარგები და ჟანრები, ელემენტები და პრინციპები, მასალა და ტექნიკა), ცოდნის გამოყენება, ანალიზისა და იდენტიფიცირების უნარები). ტესტის მეორე ბლოკში გაერთიანებულია სამი სახის დავალება — „ჭეშმარიტია — მცდარია“, „წინადადების შევსება“ და მოცემულ საილუსტრაციო მასალაზე ხელოვნების ელემენტებისა და პრინციპების წერილობით მითითება. „ჭეშმარიტია — მცდარიას“ ტიპის დავალებებს ორი შესაძლო პასუხი აქვს. ამ შემთხვევაში მოსწავლემ უნდა შეაფასოს ჭეშმარიტია თუ მცდარი მოცემული მტკიცებულება. თუ აპლიკანტის აზრით მტკიცებულება ჭეშმარიტია, უნდა მოინიშნოს შესაბამისი უჯრა, ხოლო თუ აპლიკანტი მიიჩნევს, რომ მტკიცებულება მცდარია, უნდა მონიშნოს მცდარის შესაბამისი უჯრა და საგანგებოდ გამოყოფილ არეში ჩაწეროს მცდარად შეფასებული მტკიცებულების სწორი ფორმულირება. ამ დავალებით ფასდება, თუ რამდენად კარგად იცნობს აპლიკანტი სახვით ხელოვნებასთან დაკავშირებულ პროფესიულ ტერმინოლოგიას, სახვითი ხელოვნების ელემენტებსა და პრინციპებს, მათ თავისებურებებს. დავალება ფასდება 1 ქულით. დავალებაში „წინადადების შევსება“ მოცემულია წინადადებები, რომლებშიც ერთი სიტყვაა გამოტოვებული. ცარიელი ადგილი წინადადებაში ხაზებითაა აღნიშნული. წინადადება სიტყვებით ისე უნდა შეივსოს, რომ აზრობრივად გამართული ჭეშმარიტი მტკიცებულება მივიღოთ. ამ ტიპის დავალებებიც დაგვეხმარება შევაფასოთ, თუ რამდენად ფლობს აპლიკანტი სახვით ხელოვნებასთან დაკავშირებულ პროფესიულ ტერმინოლოგიას, იცნობს თუ არა სახვითი ხელოვნების ელემენტებსა და პრინციპებს, მათ თავისებურებებს და რამდენად ადეკვატურად შეუძლია ამ ცოდნის გამოყენება პრაქტიკაში. თითოეული კითხვა ფასდება 1 ქულით. ვინაიდან ჩვენ ვერ ვამოწმებთ პრაქტიკულ უნარებს (არ გვექნება პრაქტიკული ტიპის დავალება, რადგან არ გვინდა შევზღუდოთ ახალგაზრდები, ვინც ამ საგანს ჰუმანიტარული ფაკულტეტისთვის ირჩევს), საგამოცდო ტესტისთვის შევარჩიეთ ერთი საინტერესო დავალება — მოცემულია სურათი (გრაფიკული ჩანახატი ან ფერწერული ნამუშევრის დეტალი), რომელზეც ისრებით მითითებულ მონაკვეთებს აბიტურიენტმა სახვითი ხელოვნების ელემენტი და პრინციპი უნდა შეუსაბამოს დავალებაში მოცემული ჩამონათვალიდან. ეს დავალება შესაძლებლობას მოგვცემს დავადგინოთ, რამდენად იცნობს აბიტურიენტი — სად არის განათება, სად არის დაცემული ჩრდილი, სად არის ანარეკლი ან ათინათი, რეფლექსია და ა.შ., რომელია მონასმი ფერწერულ ნამუშევარზე, სად არის ნაჩვენები გრადაცია და ა.შ. თითოეული სწორად შესაბამებული მონაკვეთი ფასდება 1 ქულით. მთლიანად ეს დავალება 5-ქულიანია. ტესტის მესამე ბლოკი ღია ტიპის კითხვებისგან შედგება. მათგან ერთი 4 ქულით, ერთი 9 ქულით, ერთი კი 15 ქულით ფასდება. ამ ტიპის დავალებები ფაქტობრივი მასალის ცოდნას, ცოდნის გამოყენების, მხატვრული ნაწარმოების აღქმის, ანალიტიკური აზროვნებისა და არგუმენტირებული მსჯელობის, განზოგადების (მოცემულობასთან ხელოვნების ნიმუშის ადეკვატურად დაკავშირების, ხელოვნების ნიმუშების შედარების, საერთო და განმასხვავებელი ნიშნების დადგენის, კონტექსტში გააზრებისა და განხილვის და ა. შ.), ასევე შეფასების უნარებს ამოწმებს. პირველ დავალებაში მოცემული იქნება საილუსტრაციო მასალა (ზოგან ერთი, ხოლო ზოგან კი ორი). აპლიკანტმა მოცემულ მასალაზე დაკვირვებისა და დავალების პირობაში დასმული საკითხის შესაბამისად უნდა გამოხატოს საკუთარი მოსაზრება. მსჯელობის წარმართვაში მათ დავალების პირობაში მოცემული მითითებები დაეხმარება. ძირითადად, ეს დავალება შეეხება ხელოვნების ნიმუშის მხატვრულ სტილთან ან/და მიმდინარეობასთან იდენტიფიცირებას და ასევე ამ სტილის ან/და მიმდინარეობის თავისებურებებზე მსჯელობას, ამ მსჯელობის საფუძველზე, რეზიუმეს სახით, სტილისა და ხელოვნების ნიმუშის დამახასიათებელი ნიშნების შეჯერებას. დავალება ფასდება 4 ქულით. პირველი ტიპის დავალებისაგან განსხვავებით, მეორე სახის დავალებაში წარმოდგენილი იქნება მხოლოდ მოცემულობა და მითითებები საილუსტრაციო მასალის გარეშე. აბიტურიენტმა დაკვირვებით უნდა წაიკითხოს ისინი, გააანალიზოს და სრულყოფილი პასუხისათვის შესაბამისი ხელოვნების ნაწარმოებები შეარჩიოს. შერჩეული ნიმუშები, მოცემულობისა და კითხვების შესაბამისად, ზედმიწევნით სრულყოფილად გააანალიზოს. დავალება ფასდება 9 ქულით. მესამე დავალებაში მოცემულია სახვითი ხელოვნების რომელიმე დარგის 2 ნიმუში. მოცემული მითითებების საფუძველზე აპლიკანტმა ნიმუშები უნდა შეადაროს ერთმანეთს, დაადგინოს საერთო და განმასხვავებელი ნიშნები, მიაკუთვნოს ნაწარმოებები მხატვრულ ეპოქას ან/და მიმდინარეობას, განიხილოს ისინი ისტორიულ და კულტურულ კონტექსტში, იმსჯელოს გავლენებზე და გამოხატოს საკუთარი დამოკიდებულება მათ მიმართ. დავალება ფასდება 15 ქულით. შეცდომისგან დაზღვეული არავინაა, თუმცა თუ სურათის მიხედვით ანალიზი სწორად არის გაკეთებული, რასაკვირველია, ეს ადამიანი გარკვეულ კრედიტებს მოიპოვებს. შეფასების სქემები დეტალურად გვაქვს გაწერილი ბროშურაში, რომელიც ცენტრის ვებგვერდზე დევს, აბიტურიენტებს შეუძლიათ ნახონ და მარტივად გაიგებენ, თუ რა როგორ შეფასდება. შეიძლება ერთმა სწორმა წინადადებამ ან თუნდაც ერთმა სწორმა სიტყვამაც კი მოუტანოს აბიტურიენტს ქულა. ერთი მნიშვნელოვანი რჩევა მინდა მივცე აბიტურიენტებს — ყველა ხელოვნების ნიმუში გარკვეულ ემოციას გამოხატავს, იმ ემოციას, რომელიც შემოქმედს აქვს ჩადებული ამა თუ იმ ხელოვნების ნიმუშში. რასაკვირველია, უნდა ვისაუბროთ ამ ემოციაზე, მაგრამ არა ამ ემოციის სიღრმეებზე, არამედ იმაზე, თუ ხელოვნების ვიზუალური ხერხებისა და პრინციპების საშუალებით როგორ, რა მხატვრული ხერხების გამოყენებით შექმნა მხატვარმა ეს ემოცია — წამყვანია ფერი, ხაზი, შუქ-ჩრდილი, კონტრასტი თუ სხვა; როგორ არის დაბალანსებული ყველა ეს ელემენტი, რადგან სახვითი ხელოვნების ელემენტებისა და პრინციპების თავისებური, ყველა შემთხვევაში სრულიად განსხვავებული ერთობლიობა, ანუ სახვითი ენის თავისებური ჰარმონია ქმნის ემოციას ნაწარმოებში. არ გვჭირდება ბიოგრაფიებისა და წლების დაზეპირება, მთავარია ვიზუალურად ვიცნობდეთ პროგრამულ მასალას და უნდა გვქონდეს თეორიული ცოდნა იმ მხატვრული სტილებისა და ხელოვნების ისტორიის ეპოქების შესახებ, რომლებიც პროგრამაშია შეტანილი. აბიტურიენტს უნდა შეეძლოს, კავშირი დაამყაროს სტილს, მიმდინარეობას, ეპოქასა და ხელოვნების ნიმუშს შორის. ეს გამოცდა ცოდნისა და ცოდნის გამოყენების გარდა, ინდივიდუალურ, თავისუფალ აზროვნებას ამოწმებს.
ესაუბრა ლალი თვალაბეიშვილი
|