2014-02-06 აპრობაციის შედეგად მოდიფიცირებული ტესტი გვესაუბრება შეფასებისა და გამოცდების ეროვნული ცენტრის უცხო ენებისჯგუფის ხელმძღვანელი რუსუდან ტყემალაძე:
2014 წლის ეროვნულ გამოცდებზე სამი სიახლე იქნება უცხო ენის გამოცდაზე, ყველაზე მნიშვნელოვანია მოსმენის კომპონენტის დამატება. 2005 წლიდან, ტრადიციულად, ჩვენი ტესტი მხოლოდ კითხვის და წერის ელემენტებისგან შედგებოდა. უცხო ენის ცოდნა კი გულისხმობს ოთხ ნაწილს — წერა, კითხვა, ლაპარაკი და მოსმენა. ამიტომ ჩვენი ძველი ტესტი დაუბალანსებელი იყო, დიდი ნაწილი ეთმობოდა კითხვას, შედარებით მცირე — წერას, არ იყო მოსმენა და ლაპარაკი. ტესტი უფრო პროფესიული, საერთაშორისო სტანდარტთან დაახლოებული რომ ყოფილიყო და უკეთ შეემოწმებინა აბიტურიენტების ცოდნა, დავამატეთ მოსმენა. 100-ქულიან ტესტში მხოლოდ 8 დავალება იქნება, შესაბამისად — 8 ქულა. დავალება, თავისი შინაარსით, უფრო მარტივია, ვიდრე წაკითხულის გააზრების ნაწილი. ამას სპეციალურად ვაკეთებთ, რომ არ იყოს მოულოდნელობა ან სირთულე აბიტურიენტებისთვის, რომ მათ გაუჩნდეთ იმის შეგრძნება, რომ რაღაცას მიაღწიეს და დაძლიეს. ამ ცვლილებისთვის ერთი წელია ვემზადებით, ეს უცაბედი გადაწყვეტილება არ ყოფილა. შარშან, თებერვალში, 700-მდე მოსწავლეზე ჩავატარეთ აპრობაცია ქალაქისა და სოფლის სკოლებში და ძალიან კარგი შედეგები იყო, დაახლოებით ისეთი, როგორიც არის ხოლმე, ტრადიციულად, კითხვასა და წერაში. გავაანალიზეთ შედეგები და ამის საფუძველზე მოხდა ტესტის მოდიფიცირება. აბიტურიენტებმა უნდა იცოდნენ, რომ ეს არ იქნება ყურთსასმენებით მოსმენა ინდივიდუალური ტექნიკით, არამედ 15-კაციან სექტორში ჩაირთვება სპეციალური მოწყობილობა, სმენადობა იქნება კარგი, ჩანაწერი — სუფთა და ხარისხიანი. ვეცდებით, რომ ყველა პირობა იყოს დაცული და აბიტურიენტებს რაიმე პრობლემა არ შეექმნათ. დავალება 8 საკითხისგან შედგება. აბიტურიენტი მოისმენს ძალიან პატარა მოცულობის ტექსტს ან დიალოგს და უპასუხებს ფაქტობრივ ან ზოგად შეკითხვას, რომლებზე პასუხი გარკვევით ისმის ჩანაწერში. თითოეული ტექსტი მოისმინება ორჯერ (დაახლოებით ნახევარი წუთი გრძელდება), მოსმენებს შორის საკმაოდ დიდი პაუზები იქნება, რომ აბიტურიენტებმა ყურადღებით წაიკითხონ ტექსტური მონაცემი — შეკითხვა და ოთხი სავარაუდო პასუხი, არ იჩქარონ და ოთხი შესაძლო პასუხიდან ერთ-ერთი შემოხაზონ. მთლიანად მოსმენის დავალება 10 წუთი გრძელდება. მოსწავლეებს მოსმენის ნაწილისთვის გავარჯიშება არ უნდა გაუჭირდეთ, ამის საშუალებას იძლევა უცხო ენის ნებისმიერი სახელმძღვანელო. სამწუხაროდ, მასწავლებლების უმრავლესობა იგნორირებას უკეთებს მოსმენის დავალებას, სხვადასხვა მიზეზების გამო — ზოგიერთ სკოლებს არ აქვთ შესაბამისი ტექნიკა, ზოგჯერ, პირდაპირ ვთქვათ, რომ უბრალოდ ეზარებათ და ტოვებენ მოსმენის დავალებას. მოსმენის წილი ეროვნულ სასწავლო გეგმაში არის 1/4, ასევე, ნებისმიერი თანამედროვე სახელმძღვანელოს 1/4, ოთხივე უცხო ენაში, ეთმობა მოსმენის დავალებებს. იმის თქმა, რომ ეს ახალი შემოსულია, გამორიცხულია. თითქმის ათი წელია მუშაობს ახალი ეროვნული სასწავლო გეგმა (რომელზე დაყრდნობით დგება სასკოლო სახელმძღვანელოები და რომლის მიხედვით უნდა წარიმართოს სასწავლო პროცესი ზოგადსაგანმანათლებლო სკოლებში), რომელშიც მოსმენას ისეთივე ადგილი უკავია, როგორც კითხვას ან წერას. რა თქმა უნდა, გასათვალისწინებელია ის, რომ სკოლებს არ აქვთ ტექნიკური საშუალებები, არ აქვთ კომპაქტდისკები, მაგნიტოფონები და ა.შ. ამის გამოსწორებაზე სკოლამ უნდა იზრუნოს. რადგან ეს მოთხოვნა არის ეროვნულ სასწავლო გეგმაში, მიმაჩნია, რომ სკოლა ვალდებულია, უცხო ენის მასწავლებელს შეუწყოს ხელი — თუნდაც გამოუყოს კომპიუტერის ოთახი (რომელიც დღეს ყველა სკოლაშია) ან შეიძინოს სპეციალური პატარა მაგნიტოფონი. მასწავლებელმაც უნდა იაქტიუროს და მოსთხოვოს დირექციას და დირექტორმაც უნდა მიაქციოს ამას ყურადღება. ერთი რამ მინდა გავიმეორო, რომ ყველა სკოლას აქვს კომპიუტერული კლასი და ინტერნეტი, ძალიან შორს მდებარე მთიან სოფლებშიც კი, ოთხი კომპიუტერი მაინც (სკოლის გამოსაშვებ გამოცდებს, ე.წ. „კატის“, რომ ვატარებთ, სკოლებში დავდივართ და ზუსტად ვიცით). ძალიან დიდია მასწავლებლის როლი. სწორედ მან უნდა მიაჩვიოს მოსწავლე დამოუკიდებლად მუშაობას — ინტერნეტი სავსეა სხვადასხვა ტიპის მოსმენის დავალებებით, შეიძლება იყოს დავალების გარეშე მოსმენაც, არის მშვენიერი ტექსტები — ბიბისის აქვს ძალიან კარგი სასწავლო საიტი, ასევე ბრიტანეთის საბჭოს სპეციალურად მათთვის, ვისთვისაც ინგლისურია უცხო ენა. ეს ინტერნეტგვერდები მითითებულია ჩვენი ცენტრის ვებგვერდზე — naec.ge-ზე, ჩვენს რეკომენდაციებში. მასწავლებელმა უნდა ურჩიოს მოსწავლეებს, დამოუკიდებლად შევიდნენ ამ საიტებზე და იმეცადინონ სკოლის კომპიუტერის ოთახში ან ვისაც ამის საშუალება აქვს — სახლში. თუ აბიტურიენტი და მასწავლებელი კარგად დაგეგმავენ უცხო ენის გამოცდისთვის მზადების პროცესს და მშობელიც შეუწყობს ხელს, საკმაოდ იოლად მისაღწევი იქნება. უამრავი ფილმია უცხოურ ენებზე, რომლებიც შეიძლება ინტერნეტით ინახოს, უბრალოდ ადამიანმა უნდა მოინდომოს. რაც შეეხება მეორე სიახლეს, ტესტს კიდევ ერთი ძალიან პატარა წერითი დავალება დაემატა — განცხადებაზე ან წერილზე პასუხის გაცემა. ეს არის 6-ქულიანი დავალება, დაახლოებით, 10-15-წუთიანი. მიგვაჩნია, რომ პრაქტიკულად გამოსადეგი დავალებაა — აბიტურიენტები ივარჯიშებენ რა ამ დავალებაზე, მათ პატარა წერილის დაწერის ცხოვრებისეული უნარი განუვითარდებათ. ეს შეიძლება იყოს ფორმალური ან არაფორმალური, ამას ყურადღებას არ ვაქცევთ, მთავარია, აბიტურიენტმა კარგი სტრუქტურები გამოიყენოს, კარგად დასვას კითხვა და სასკოლო პროგრამის ფარგლებში დაწეროს პატარა წერილი. მესამე სიახლე არის ყოფილი მესამე დავალება, სადაც აბიტურიენტს აბზაცებისთვის სათაურები უნდა მიესადაგებინა. დავალება შევცვალეთ — აბზაცები რჩება, მაგრამ გამოგვაქვს არა სათაურები, არამედ წინადადებები და უნდა მოძებნონ ეს წინადადება, შინაარსობრივად, რომელ აბზაცშია. ძალიან კარგი სავარჯიშოა, კარგად ავითარებს ტექსტის სწრაფი კითხვის უნარს და თუ ამაზე ივარჯიშებენ აბიტურიენტები განუვითარდებათ ტექსტიდან საჭირო ინფორმაციის სწრაფად ამოკრების უნარი, რაც ჩვენს ახალგაზრდებს ნაკლებად აქვთ. უცხო ენის ტესტი ისევ 100-ქულიანი რჩება, მაქსიმალური ქულა არ შეცვლილა. ხშირად გვეკითხებიან, როგორ ხდება ეს, როცა დაემატა მოსმენა და მეორე წერა? დავალებებს გამოაკლდა საკითხები — 10-საკითხიანი დავალება გახდა 8-საკითხიანი, განცხადებები იყო 12-საკითხიანი და გახდა 8-საკითხიანი. ჩვენი ტესტი უფრო დაბალანსდა — ცოტათი შემცირდა კითხვის და გრამატიკის ნაწილები, სამაგიეროდ დაემატა მოსმენა და კიდევ ერთი დავალება. ამგვარად ჩვენი ტესტი ცოტა მიუახლოვდა საერთაშორისო ტესტს უცხო ენებში, სადაც ზუსტად 25-25% აქვს დათმობილი წერას, კითხვას, ლაპარაკსა და მოსმენას. ამგვარი ტესტი სრულად ამოწმებს უცხო ენის ცოდნას. ჩვენთან, გარკვეული მიზეზების გამო, ეს ბალანსი დაცული არ იყო. მოსმენის ნაწილის დამატებით ერთი ნაბიჯით მივუახლოვდით საერთაშორისო სტანდარტს. ნებისმიერი ტესტი უნდა აჰყვეს დროს, არ შეიძლება წლების განმავლობაში ერთი და იგივე ფორმატი რჩებოდეს. თანამედროვე მოთხოვნების შესაბამისი რომ იყოს, ტესტი ყოველ 5-6 წელიწადში მოითხოვს განახლებას.
ესაუბრა ლალი თვალაბეიშვილი
|