2014-04-10
გადაწყვეტილების შეცვლის ხმაურიანი მცდელობა
ანა ფირცხალაიშვილი
განათლების სამინისტროს წინ, ტრადიციულად, განაწყენებული პედაგოგები პროტესტის გამოსახატავად და მინისტრთან შესახვედრად შეიკრიბნენ. უფრო მშვიდობიანი გზით მსგავსი კომუნიკაცია, კარგა ხანია, ჩვენთან ვერ ხერხდება. არადა, უახლესი წარსული მაგალითია იმისა, რომ დიალოგით, ოპონენტთა მოსაზრების გათვალისწინებით თუ არა, დაინტერესებით ბევრი საკითხი სიმწვავეს მაინც დაკარგავდა თუ არ მოგვარდებოდა. დასანანია, რომ წარსულის გაკვეთილები მალე გვავიწყდება, საკუთარ შეცდომებზეც ვერ ვსწავლობთ.
ამჯერადაც ასე მოხდა. 53-ე სკოლის პედაგოგებს მაშინ შევხვდით, როცა ისინი განათლების სამინისტროს მოპირდაპირე ეზოში სკამებზე ჩამომსხდარნი, განერვიულებულები, მინისტრთან შეხვედრაზე თანხმობას ელოდნენ. პასუხის მოლოდინში რამდენიმე მათგანს ვესაუბრეთ.
ყველაფერი ამ ორი თვის წინ დაიწყო, როცა, სრულიად მოულოდნელად, განათლების სამინისტროს გენერალური ინსპექცია სკოლაში ფართომასშტაბიანი შემოწმებისთვის შევიდა. პედაგოგთა ნაწილი მიიჩნევს, რომ შემოწმება პროცედურული დარღვევით დაიწყო. ამიტომ გადაწყდა იმთავითვე გაერკვიათ, რის საფუძველზე მოწმდებოდა სკოლა. მხოლოდ რამდენიმედღიანი დუმილის შემდეგ უპასუხა სამინისტრომ სამეურვეო საბჭოს მიმართვას, რომ ვინმე თორნიკე ლომიძის განცხადების (საჩივრის) საფუძველზე. ასეთ პიროვნებას კი სკოლაში არავინ იცნობს, ამიტომ გაჩნდა ეჭვი, რომლის გასაქარწყლებლადაც პედაგოგებმა მინისტრთან შეხვედრა მოითხოვეს.
მარინა ბასილაშვილი, პედაგოგი: 2003 წლიდან ხუთი დირექტორი გამოვიცვალეთ. ქალბატონი მარიამ რამინაშვილი მეექვსეა. წელიწადზე მეტია მოვალეობას ასრულებს (ივლისში 2 წელი გახდება). მისი დირექტორობის პერიოდი ყოველმხრივ გამორჩეულია სკოლისთვის. ზედმიწევნით კარგად იცის სკოლა და სასწავლო პროცესი. მონაწილეობდა განათლების შესახებ კანონის შექმნაში, განათლების რეფორმის ყველა ეტაპის აქტიური მონაწილეა. ამიტომაც განვიცდით ასე მწვავედ იმას, რაც მოხდა. ამიტომაც გავუგზავნეთ ქალბატონ თამარ სანიკიძეს 105-დან 98 მასწავლებლის ხელმოწერილი წერილი თხოვნით, შეგვხვედროდა და მოესმინა ჩვენი აზრი დირექტორის შესახებ, გვეკითხა, ახლა, როცა საუკეთესო სამუშაო პირობებია სკოლაში, რატომ გახდა აუცილებელი შემოწმება. იქვე ეჭვსაც გამოვთქვამდით შემმოწმებელთა კვალიფიკაციის გამო (პირველ დღებში თავიანთი სახელებიც კი არ გვითხრეს). პასუხს ვერც დავარქმევ იმას, რაც მივიღეთ, ეს იყო შეტყობინება იმის შესახებ, რომ სამინისტროს გადაწყვეტილება სამართლებრივად სწორია, შეხვედრაზე კი არაფერი იყო ნათქვამი. არადა, რომ შეგვხვედროდა და გვესაუბრა, იქნებ ეს შედეგი არც დამდგარიყო. მიუხედავად იმისა, რომ თითოეული ჩვენგანი სასწავლო პროცესის ჩაშლის წინააღმდეგია (ჩვენ ეს გაცილებით მძიმე წლებშიც არ გაგვიკეთებია), სკოლა გაფიცულია. პროტესტი მანამ გამოვხატეთ, სანამ ბრძანება მოვიდოდა გათავისუფლების შესახებ. გვეგონა, ამ გზით შევაჩერებდით უსამართლო გადაწყვეტილებას, მაგრამ შევცდით. მათაც ძალიან იჩქარეს, იმდენად, რომ ჯერ ბრძანება გამოგვიგზავნეს და შემდეგ აუდიტის სამსახურის დასკვნა, გაფრთხილებასთან ერთად. არ ვიცი რა გამოგვივა, მაგრამ ყოველმხრივ უნდა შევეცადოთ, მინისტრმა გადაწყვეტილება შეცვალოს, ვნახოთ, რას შევძლებთ.
რაკი სხვებთან ერთად, მომლოდინეთა შორის სკოლის სამეურვეო საბჭოს თავმჯდომარეც აღმოჩნდა, აზრის გამოთქმა მასაც ვთხოვეთ.
ქეთი ნიჟარაძე: მთელ ამ ისტორიაში კანონიერება და სამართლიანობა სრულიად უგულებელყოფილია. აუდიტის დასკვნა ჯერ სამეურვეო საბჭოს უნდა განეხილა და ჩვენ მიერ გამოთქმული მოსაზრებების გათვალისწინებით (ან გაუთვალისწინებლად) მიეღო სამინისტროს გადაწყვეტილება. არ ვიცი რატომ, მაგრამ იმდენად ჩქარობდნენ და იმდენად დაბნეულები იყვნენ, რომ დილის 9 სთ. 30 წუთზე ბრძანება მივიღეთ დირექტორის გათავისუფლების შესახებ, ხოლო 14 სთ. 10 წუთზე — აუდიტის დასკვნა და გაფრთხილების შესახებ ბრძანება. ყველაფერი ნათელია, მაგრამ ვერ ვხვდებით, რატომ. მინისტრთან კარგი ურთიერთობა ჰქონდა ჩვენს დირექტორს. ყველა მინისტრისთვის სანატრელია ასეთი კვალიფიკაციისა და საქმისადმი ერთგული კადრი, ნიჭიერი ადამიანი. ის, რაც დასკვნაში წერია, როგორც ხარვეზი, არ იძლევა ასეთი უკიდურესი გადაწყვეტილების მიღების საფუძველს. ეს მხოლოდ ჩვენი მოსაზრება არ არის, ამას კომპეტენტური სპეციალისტებიც გვიდასტურებენ. მთელი წლის განმავლობაში არც მოიჯარეს, არც მოსწავლეებსა თუ მშობლებს არ გამოუთქვამთ უმნიშვნელო პრეტენზიაც კი. ქალბატონი მარიამი იმდენად მოწესრიგებული პიროვნებაა, იმდენად სკურპულოზულად აკეთებს ყველა საქმეს, გამორიცხულია რაიმე სერიოზული შეცდომა დაეშვა, არა თუ დანაშაული ჩაედინა. ამდენი წლის შემდეგ, როგორც იქნა, ვეღირსეთ მშვიდ შრომის პირობებს და აი, რა ზომამდე მივედით — სასწავლო პროცესის ჩაშლა ყოვლად დაუშვებელია, მაგრამ ჩვენ, პირველ რიგში, ამ ქვეყნის მოქალაქეები ვართ და ასევე დაუშვებელია უსამართლობასთან შეგუება.
თავად ქალბატონი მარიამისთვის თანამდებობიდან მისი გათავისუფლების რეალური მიზეზი უცნობია. ამბობს, რომ აუდიტის დასკვნის თითოეული პუნქტი ადამინისტრაციული ტიპის საქმისწარმოების დარღვევაა, რომელიც, ხშირ შემთხვევაში, მასზე არც არის დამოკიდებული და დარწმუნებულია, რომ თავად სამინისტროშიც იქნება ასეთი ტიპის პრობლემები.
დოკუმენტში ფინანსურ დარღვევებზეც კეთდება აქცენტი. ჩვენთან საუბარში ქალბატონი შორენა გამყრელიძე (ყოფილი მოადგილე) ამბობს: 2007 წლიდან იჯარით ფართის გაცემის ასეთი სქემა მოქმედებდა — ოფიციალურად გაფორმებული იყო მხოლოდ 2 საათი, დანარჩენი საათების საიჯარო თანხა სად მიდიოდა, არავინ იცოდა, თუმცა რეალურად ეს ფართი მთელი დღით დაკავებული იყო და სარდაფში შესვლის უფლება მხოლოდ ერთ ადამიანს ჰქონდა. ახლა ყველა საათი „გათეთრდა“. შედეგი ისაა, რომ მეიჯარეს გაეზარდა გადასახადი, შესაბამისად გაიზარდა სკოლის ბიუჯეტიც, თუმცა მოსწავლეებისთვის თანხა არ შეცვლილა. ასე რომ, ამ მხრივაც ყველაფერი წესრიგშია.
საკუთარ უდანაშაულობაში დარწმუნებული ყოფილი დირექტორი ამბობს, რომ გადაწყვეტილებას გაასაჩივრებს. ეს აუცილებელია იმისთვის, რომ „ვიცოდე ჩემი სიმართლისა თუ შეცდომის ზღვარი სად გადის, შემდგომი ცხოვრების გასაგრძელებლად“.
53-ე სკოლის პედაგოგთა საინიციატივო ჯგუფისა და განათლებისა და მეცნიერების მინისტრის თამარ სანიკიძის შეხვედრა უშედეგოდ დასრულდა. მინისტრი აცხადებს, რომ „დასკვნა გამყარებულია შესაბამისი ფინანსური დოკუმენტაციით. აქედან გამომდინარე, არანაირი დისკრეცია არ მაქვს, დასკვნა გავაუქმო. შესაბამისად, ყველაზე ლეგიტიმური გზა სასამართლოში გასაჩივრებაა. ამის შესახებ განემარტათ მათ და რამდენადაც ვიცი, აპირებენ კიდეც“.
შეხვედრის დასრულების შემდეგ, საინიციატივო ჯგუფის წევრებმაც გააკეთეს კომენტარი. მათი შთაბეჭდილებით, გენინსპექციამ მინისტრი შეცდომაში შეიყვანა. ტყუილია, რომ სკოლის 6 საკლასო ოთახი ნებართვის გარეშეა გაცემული. სინამდვილეში არსებობს ეკონომიკისა და მდგრადი განვითარების სამინისტროს ნებართვა და მისი გასაჯაროება სკოლას ნებისმიერ დროს შეუძლია.
მათ იმედი აქვთ, რომ საკუთარ სიმართლეს სასამართლოში დაამტკიცებენ.
|
