2015-11-26 ცვლილება მხოლოდ ტექნიკურ-ფორმატულ განსხვავებას შეეხება გვესაუბრება შეფასებისა და გამოცდების
ეროვნული ცენტრის უცხოური ენების ჯგუფის ხელმძღვანელი
რუსუდან ტყემალაძე
ნაწილობრივი ელექტრონული ფორმატი მართლაც მნიშვნელოვანი, საეტაპო ცვლილებაა. ე.წ. ქაღალდზე დაწერილი ტესტის ნაცვლად, აბიტურიენტებს მოუწევთ ეკრანზე წაიკითხონ დავალებები და ისე შეასრულონ. მათ ამობეჭდილი ტესტები არ ექნებათ. ეს სიახლე უფრო მეტად ფორმატულ ცვლილებას ეხება, ვიდრე შინაარსობრივს, ანუ შინაარსობრივად ჩვენი ტესტი როგორც იყო 100-დავალებიანი და როგორი სახის დავალებებიც იყო ტრადიციულად (ბოლო ორი წელია, შემოვიტანეთ მოსმენა, როგორც პირველი დავალება და წერითი დავალება — წერილი), ისეთივე რჩება და სიახლე არ იქნება. ალბათ, არც იქნებოდა სწორი, რომ იმ ტექნიკური სიახლის გარდა, რაც ასე მნიშვნელოვანია, კიდევ შინაარსობრივი ცვლილებები შემოგვეტანა. ასე რომ, ცვლილება შეეხება მხოლოდ ტექნიკურ-ფორმატულ განსხვავებას.
უცხოური ენის გამოცდის ხანგრძლივობა იყო ორსაათ-ნახევარი. ახლა არ შემიძლია ვთქვა, ეს შეიცვლება თუ არა, რადგან მოსალოდნელია ამ ფორმატის პილოტირება. ყველაფერი ნათელი გახდება მას შემდეგ, რაც გამოიცდება ელექტრონული ფორმატი, უკვე რეალურად, მომავალ აბიტურიენტებზე. ჩვენ გავაკეთებთ სპეციალურ სავარჯიშო ტესტს და ის გვიჩვენებს, რამდენად მისაღებია ეს დრო.
თუ ბეჭდური ტესტების ერთ ფურცელზე, დავუშვათ პირველ დავალებაში, ერთად იყო მოთავსებული ათი დავალება, ახლა ეს ხუთ ელექტრონულ გვერდზეა გაშლილი. ნახეთ, როგორი ტექნიკური განსხვავებაა, შინაარსობრივად, თითქოს არაფერი, მაგრამ ის, რაც იყო ერთ გვერდზე და აბიტურიენტს არ უხდებოდა ამ გვერდის ხშირად გადაფურცვლა, ეკრანზე ხუთ გვერდზეა გაშლილი, თითოზე — ორ-ორი. ე.წ. ელექტრონული გადაფურცვლა რთული არ არის, საკმარისია ერთ ღილაკზე თითის დაჭერა, რომელიც მოსწავლეს წაიყვანს მარჯვნივაც და მარცხნივაც, მას შეუძლია გადავიდეს შემდეგ დავალებაზე ან დაუბრუნდეს წინას. რასაკვირველია, თუ ადრე ტესტი იყო, დავუშვათ, 16-გვერდიანი, ახლა 32 გვერდია, მაგრამ ამ შემთხვევაში გვერდი ძალიან პირობითია, რადგან ჩვენ ეს დავალებები ეკრანზე სპეციალურად გავზარდეთ, რომ თვალისთვის მოსახერხებელი იყოს, გავზარდეთ, ასევე, ასოების სიდიდე და ამგვარად გაშლილი დავალება უკეთ კითხვადია, ვიდრე ბეჭდურ კრებულის ფურცელზე იყო. ამას თავისი უპირატესობები, რასაკვირველია, აქვს.
როდესაც პირველი დავალება ვახსენე, მოსმენის დავალებას ვგულისხმობდი, რაზედაც აბიტურიენტებმა კარგად უნდა ივარჯიშონ იმიტომ, რომ ტესტის ტექნიკური ნაწილი ისეთივე მნიშვნელოვანია, როგორც შინაარსობრივი. როგორც მოგახსენეთ, ერთ ფურცელზე განთავსებული დავალება ხუთ გვერდზე (მოსმენის ორ-ორი დავალება თითო გვერდზე) გაიშალა. ეს უკვე იმის მაჩვენებელია, რომ აბიტურიენტმა უნდა ივარჯიშოს სწორედ იმაზე, როგორ გადაფურცლოს დავალება კომპიუტერის ეკრანზე. ამავდროულად, ძალიან ბევრი ვარჯიში დასჭირდება იმასთან დაკავშირებითაც, ამ დავალებას რომ მოისმენს, უნდა მოახერხოს სწორი პასუხის ჩანიშვნა, სანამ მეორე დიალოგი ან ტესტი დაიწყება. ადრე ასე იყო — ფურცელზე შავად ინიშნავდა სწორ პასუხს და მერე პასუხების ფურცელზე გადაჰქონდა. მას ახლაც ექნება შავი ფურცელი, რომ იგივე გააკეთოს, მაგრამ აქ ერთი მომენტია გასათვალისწინებელი — მან ჯერ უნდა უყუროს ეკრანს, რომ ოთხი შესაძლო პასუხიდან სწორი ამოირჩიოს, მერე დაიხედოს ქვევით, მაგიდაზე, პასუხების ფურცელზე დაწეროს სწორი პასუხი და ისევ სწრაფად ეკრანზე გადაიტანოს ყურადღება, რომ შემდეგ დავალებას მოუსმინოს. აქ ადამიანს კომბინირებული უნარები სჭირდება, რაც ადვილი მისაღწევია ვარჯიშის შედეგად.
მოსმენის ნაწილისთვის გამოყოფილია 12-13 წუთი, რადგან ოთხი ენაა, დროის ზუსტი დამთხვევა შეუძლებელია, ენებს შორის განსხვავება წუთი-წუთნახევარია. მაქსიმალური დროა 13 წუთი და პილოტირების მერე ვნახავთ, ეს დრო საკმარისია თუ არა. დიალოგებს შორის გვაქვს გარკვეული ინტერვალი, რომელიც აბიტურიენტს საშუალებას აძლევს, ჩანიშნოს სწორი პასუხი და ყურადღება შემდეგ ტექსტზე გადაიტანოს. აქ მოსმენის ასეთი სტრატეგიაა — მან ეს ტექსტი არა მარტო უნდა მოისმინოს, არამედ წინასწარ გადახედოს შემდეგ მონაცემს (ამას ალბათ 10 წამიც კი არ სჭირდება), ანუ ტექსტზეც უნდა გადაიტანოს ყურადღება. პილოტირება, რომელიც დეკემბერში იგეგმება, გვიჩვენებს, რამდენად საკმარისია მოცემული დრო. იმედი მაქვს, რომ საკმარისი იქნება, რადგან ჩვენ ეს ინტერვალები თავიდანვე გვქონდა ჩადებული — როდესაც აბიტურიენტი ისმენს დიალოგებსა და ტექსტებს, იქ აუცილებლად უნდა იყოს ინტერვალები. თუ რაიმე პრობლემა შეექმნებათ და დრო არ ეყოფათ, ჩვენ კიდევ 3-4 წამით გავზრდით (სწორედ წამით და არა წუთით, რადგან მოსმენის დროს, წუთი ძალიან ბევრია). თითოეული ჩანაწერი ნახევარწუთიანია, ინტერვალები 5-წამიანია, რაც მოსმენის დავალებისთვის საკმარისია, რომ შემდეგ დავალებაზე გადახვიდე. დიდი ინტერვალი ყოველთვის ფანტავს ადამიანის ყურადღებას და მიზანშეწონილი არ არის მსგავსი დავალებების შესრულების დროს.
კიდევ ერთხელ გავიმეორებ, როგორ იგეგმება მოსმენის ნაწილი. აბიტურიენტი ისმენს ჩანაწერს (მოსმენის დავალებაში 10 დამოუკიდებელი პატარა ტექსტია), თითოეულ ტექსტს და, 4 შესაძლო პასუხიდან, ირჩევს ერთ-ერთს, რომელიც მოსმენის ტექსტთანაა დაკავშირებული და პასუხების ფურცელზე სწორ პასუხს ჯვარედინად გადახაზავს ან შავად მონიშნავს, როგორც მისთვის უფრო მოსახერხებელია. შემდეგ მას გარკვეული ინტერვალი აქვს, რომ გადავიდეს შემდეგზე, გადაავლოს თვალი და ჩანაწერიც ამას მიჰყვება, აბიტურიენტი არ არეგულირებს ჩანაწერს, ჩვენ ვარეგულირებთ. ჩანაწერი თავად არის ინტერვალებიანი და ტექნიკურად მოწესრიგებული. ისევე როგორც შარშან და შარშანწინ, ჩვენი მეთვალყურე ჩართავს ჩანაწერს და აბიტურიენტები შეასრულებენ დავალებებს. არ არის გამორიცხული, რომ პილოტირების შემთხვევაში, აბიტურიენტს თვითონვე მოუწიოს ჩანაწერის ჩართვა, მაგრამ მისი დარეგულირება მას არ მოუწევს, ის მხოლოდ ჩართავს (ან მეთვალყურე). ჩანაწერში ყველაფერი ტექნიკურად უკვე დალაგებულია და ამაზე მათ შეუძლიათ არც იფიქრონ. ვურჩევ ყურადღება გაამახვილონ სწორი პასუხის რაც შეიძლება სწრაფად მონიშვნაზე. მოსმენის დროს არ არის საჭირო დიდხანს ფიქრი, ეს არ არის წაკითხულის გააზრება, ეს არის მოსმენა — გაიგებ ინფორმაციას, ჩანიშნავ. რაც მეტი დრო გადის, მიღებული ინფორმაცია გავიწყდება, ანუ სწრაფად უნდა მონიშნო, რაც სწორ პასუხად მიგაჩნია. ეს არ არის ისეთი დიდი ტექსტი, რომ დიდხანს ეძებო შიგ ინფორმაცია, ნახევარწუთიანი ტექსტებია. ამიტომ აბიტურიენტი მოსმენისას ასრულებს დავალებას, ტექსტი ორჯერ მეორდება და მას შეუძლია, მეორე მოსმენისას, პასუხი გადაამოწმოს და მაშინვე, მომენტალურად მოხაზოს. მიმაჩნია, რომ სწორედ ამაშია საჭირო გავარჯიშება, რომ დროულად აღნიშნოს პასუხი ფურცელზე, რადგან ნაწილობრივ ელექტრონული ფორმატია და შემდეგ ისევ ეკრანზე უნდა გადაიტანოს ყურადღება და მოსმენაზე. ამაზე ვარჯიშიც იქნება აუცილებელი.
რაც შეეხება ტექსტების სირთულეს, ორი წლის წინ მოსმენის ნაწილის ტექსტები ძალიან მარტივი იყო. აბიტურიენტებმა, თითქოს და, დაგვცინეს კიდეც — ძალიან მარტივი ტექსტებიაო?! მართლაც მარტივი იყო, რადგან დაწყებით ეტაპზე მოსმენის დავალების შემოტანა, თავისთავად, გარკვეული სირთულე იყო. წელს ტექსტები გართულდება და ადეკვატური სირთულის იქნება — მარტივი ბ1, რაც ზუსტად შეესაბამება ეროვნული გეგმის მოთხოვნებს. ბ1 საშუალო დონეა, საერთაშორისოდ აღიარებული ნორმებით. უფრო სწორად ბ1-, ანუ მარტივი ბ1. 10 დავალებაში შეიძლება იყოს 2-3 მარტივი, 2-3 საშუალო სირთულის, მაგრამ საერთო ჯამში, წინა წლებთან შედარებით, სირთულე მეტი იქნება.
რაც შეეხება მეორე სიახლეს, რომელიც აბიტურიენტებს მოსმენის ნაწილთან ერთად შევთავაზეთ — წერილის დაწერას და როგორ ხდება მისი მორგება ელექტრონულ ფორმატზე. ბეჭდურ ფორმატში როგორც წერილში, ასევე თემაში, გვქონდა გამოყოფილი ადგილი, სადაც აბიტურიენტს საშუალება ჰქონდა, შავად დაეწერა, შემდეგ დაემუშავებინა და გადაეტანა პასუხების ფურცელზე. მოგეხსენებათ, ნაბეჭდი ტესტი მას აღარ აქვს, მაგრამ არც იმის საშუალება აქვს, რომ ეკრანზე დაწეროს (ეს ძალიან ადრეა ჩვენთვის), ამიტომ ექნება სავარჯიშო, ე.წ. შავი ფურცელი, სადაც, მას შემდეგ რაც წაიკითხავს დავალებას ეკრანზე — წერილს ან თემას, ამ დავალებას, რამდენი ხანიც უნდა, ეკრანზე გააჩერებს და დაწერს პასუხს ან პირდაპირ პასუხების ფურცელში (თუ ძალიან თვითდაჯერებულია და იცის ზუსტად, რომ სწორად წერს), ან შავად და მერე გადაათეთრებს იმისდა მიხედვით, რა დროც აქვს.
წერილში სიტყვების რაოდენობა მითითებული არ არის, მაგრამ განსაზღვრულია ის სივრცე, რომელშიც უნდა ჩაეტიოს. ეს ისეთი დავალებაა, რომ აბიტურიენტი ვერ განავრცობს. თემა შეიძლება განავრცოს, მაგრამ წერილის შემთხვევაში არის ზუსტი მითითება, რომ კითხვები დასვას. აბიტურიენტს, მოცემულ დავალებაში, ვეუბნებით — ჩაეტიე მოცემულ ადგილზე, რაც პასუხების ფურცელშია. ასე რომ, ამ შემთხვევაში პრობლემა ჯერ არასოდეს შექმნილა.
მესამე წელია, აბიტურიენტებს ვაფრთხილებთ, ნაშრომზე არ მიუთითონ სახელი და გვარი, მაგრამ, სამწუხაროდ, ყოველწლიურად მაინც არის ოცამდე აბიტურიენტი (ოთხივე ენაში), ვინც უთითებს თავის ან სხვის სახელსა და გვარს და მერე მიდის დავა. მაგალითად, აბიტურიენტი თავს იმით იმართლებს, რომ მე ჩემი სახელი და გვარი არ მიმითითებიაო, მაგრამ გამსწორებელმა ხომ არ იცის, ვისი სახელი და გვარი წერია. სრულიად აბსურდული და არაქართული სახელი და გვარიც რომ იყოს (თუნდაც მარკო პოლო ან გალილეო გალილეი), ჩვენ მაინც არ ვასწორებთ ასეთ ნაშრომებს, რადგან ნებისმიერი მითითება ითვლება, როგორც პაროლი და საკამათო ხდება. ამიტომაც ჩვენ 3 ადგილას ვწერთ გარკვევით — გთხოვთ, არ მიუთითოთ სახელი და გვარი. გარდა ამისა, დამსწრე აცხადებს, რომ არ მიუთითონ სახელი და გვარი და კიდევ ვიფიქრებთ სხვა რაიმე დამცავ მექანიზმზე, რომ გაფრთხილდნენ ის აბიტურიენტები, ვინც არ გვიჯერებს. 2015 წელსაც 17-18 მსგავსი შემთხვევა იყო და ეს დავალებები გავანულეთ, ანუ კონკრეტულად ეს დავალება შეფასდა ნულით. სამწუხაროდ, აბიტურიენტს, მისი დაუდევრობის გამო, რაღაც ქულა აკლდება. ჩვენ ძალიან ვწუხვართ, როცა იძულებული ვართ, აბიტურიენტს დავალებაში ნული დავუწეროთ.
რაც შეეხება ე.წ. ღია სახის დავალებებს, რომელიც მოითხოვს აბიტურიენტისგან დაწერას და არა უბრალოდ სწორი პასუხის აღნიშვნას. მრავალჯერადი არჩევანი არის დახურული სახის კითხვის შემთხვევაში, სადაც აბიტურიენტი უბრალოდ აღნიშნავს სწორ პასუხს, უფრო სწორად მოხაზავს, პასუხების ფურცელზე ჯვარს დასვამს. ღია სახის დავალებებში აბიტურიენტი წერს ან სიტყვას, ან წინადადებას, ან თემას. თემის შემთხვევაში, სიტყვების რაოდენობა, დაახლოებით, 150 იყო და ეს ძალაში რჩება. როგორც შარშან და შარშანწინ, აბიტურიენტს შეუძლია შავად დაწეროს ამ მოცულობის ტექსტი, თემა და მერე პასუხების ფურცელში გადაიტანოს. ამ შემთხვევაში არაფერი შეცვლილა.
ჩემი რეკომენდაციაც იგივეა, რაც გასულ წლებში — შეასრულონ ჩვენი მოთხოვნა — გთხოვთ, დაწეროთ 120-150 სიტყვა. თუ ვინმეს ჰგონია, რაც მეტს დაწერს, უკეთ შეფასდება მისი ნაწერი, ასე არ არის. ჯერ ერთი, დიდი ნაწერი ბევრ შეცდომას ნიშნავს, ბუნებრივია, ჩვენ ვითვლით შეცდომებს. გარდა ამისა, ეს ძალიან მარტივ რაღაცას ნიშნავს ტესტირებაში — თქვენ არ ასრულებთ კარგად დავალების პირობას და დავალების პირობის შესრულება, ჩვენი მხრიდან, უპირველესი მოთხოვნაა. თუ წერია, დაწერეთ 120-150 სიტყვა, შეიძლება 10-20 სიტყვით გადააჭარბოთ, მაგრამ მეტს არ გირჩევთ.
კიდევ ერთხელ შეგახსენებთ, რომ ეროვნულ გამოცდებზე, ჩვენთანაც და ნებისმიერ საგანში, ორი სახის დავალებებია — დახურული და ღია. დახურული სახისაა დავალება, როდესაც აბიტურიენტი მონიშნავს სწორ პასუხს პასუხების ფურცელზე, ის არაფერს არ წერს. ღია სახისაა დავალება, როდესაც აბიტურიენტი წერს რაიმეს — ან სიტყვას, ან წინადადებას, ან თემას. ჩვენი დავალებები პროპორციულადაა განაწილებული, თითქმის 50-60%-ია დახურული, დანარჩენი — ღია. ასეთი კომბინაციაა ჩვენთანაც და ყველა საგანში, ე.წ. კატისგან (სკოლის დამამთავრებელი გამოცდა) განსხვავებით, სადაც მხოლოდ და მხოლოდ დახურულბოლოიანი კითხვებია, ანუ მოსწავლეები არაფერს არ წერენ. რადგან კატის გამოცდებს შევეხეთ, ვიტყვი, რომ წელს არანაირი ცვლილება არ იგეგმება, ისევ იქნება გრამატიკაზე, ლექსიკაზე და წაკითხულის გააზრებაზე ორიენტირებული დავალებები, სადაც იქნება შემოსახაზი, აღსანიშნი სწორი პასუხი.
რაც შეეხება გასწორების პროცესს, ფაქტობრივად, გამსწორებლისთვის არაფერი იცვლება. მას თუ ადრე მისდიოდა პასუხების ფურცელი, ანუ აბიტურიენტის პასუხები, ზუსტად იმავე ფორმატში მიუვა წელსაც. აბიტურიენტები, წელსაც, სწორ პასუხებს აღნიშნავენ და ჩაწერენ პასუხების ფურცელში, როგორც შარშან, შარშანწინ და ბოლო 10 წელზე მეტია. პასუხების ფურცლები სკანირდება, დავალებები იჭრება და დაჭრილი მისდის გამსწორებელს. ასე იქნება წელსაც, ანუ სანამ არსებობს პასუხების ფურცელი და სანამ არ გადავალთ მთლიან ელექტრონულ ფორმატზე, გამსწორებლისთვის არაფერი შეიცვლება.
წელს პირველად, მასწავლებლები ორჯერ აბარებენ გამოცდას, გარკვეულმა რაოდენობამ ზაფხულში ჩააბარა, იანვარში კიდევ იქნება გამოცდა. უცხო ენაში დარეგისტრირებულია, დაახლოებით, 750 მასწავლებელი, ოთხივე ენაში. რა თქმა უნდა, ეს ნაკლებია იმ რაოდენობაზე, რაც ზაფხულში იყო, თუმცა არა დრამატულად. ზაფხულში, დაახლოებით, 1200 იყო. უმეტესობა — 80% ინგლისური ენის პედაგოგები არიან, ფრანგულის მასწავლებელი მხოლოდ 6 თუ 7-ია. ყველა შემთხვევაში, ჩვენ ამ გამოცდისთვის ვემზადებით. იანვარში იქნება ჩვეულებრივი, ქაღალდზე აგებული ტესტი, როგორიც იყო ადრე. თუმცა, გარკვეული პილოტირების და აპრობაციის პერიოდის გავლის შემდეგ, ზაფხულში, როგორც ჩანს, პედაგოგთა გამოცდებიც გადავა ელექტრონულ ვერსიაზე.
შინაარსობრივ ნაწილში არანაირი ცვლილება არ იგეგმება. ეს არის კომბინირებული ტესტი, რომელიც ენობრივ კომპეტენციას და მეთოდიკის ცოდნას მოიცავს — ცალ-ცალკე ვაფასებთ მოსმენას, წერას, ლაპარაკს, წაკითხულის გააზრებას, ცალკეა დამატებული მეთოდიკის ნაწილი. ამ ფორმატმა ძალიან გაამართლა და ამიტომ არანაირ ცვლილებას, ამ ეტაპზე, არ ვგეგმავთ. ცვლილება იქნება მათთვის, ვინც ზაფხულში ჩააბარებს. როგორც ჩანს, მათ მეტი უნდა ივარჯიშონ ელექტრონულ ვერსიაზე. თვალყური ადევნონ ჩვენს ვებსაიტზე გამოქვეყნებულ ყველანაირ პილოტირების პროექტს, იქვე დაიდება ელექტრონული ვერსიების ნიმუშები და მათზე უნდა ივარჯიშონ. ერთი და იგივე ტესტი შეიძლება ბევრჯერ გააკეთო, ოღონდ არა იმიტომ, რომ მაინც და მაინც სწორი პასუხები ითვალო, არამედ იმისთვის, რომ შეეჩვიო ელექტრონულ ვერსიას. როგორც ვთქვი, ეს არის გარკვეული ტექნიკა — უნდა წაიკითხო ეკრანზე დავალება, მერე გადაიტანო ყურადღება ქვევით — ფურცელზე და ისევ მიუბრუნდე ეკრანს, წაიკითხო შემდეგი დავალება, ეკრანი ამოძრავო მარცხნივ და მარჯვნივ, რაც არ არის თავისთავად რთული, მაგრამ ამას ყველაფერს ვარჯიში უნდა.
ამიტომაც ვურჩევ როგორც აბიტურიენტებს, ასევე პედაგოგებს, როცა ჩვენს საიტზე ეს ნიმუშები გამოქვეყნდება, რაც შეიძლება მეტი ივარჯიშონ. დაუძლეველი სირთულე ამაში არაფერია, პირიქით, ძალიან სახალისოა. ჩვენ გვქონდა საშუალება, ჩაგვერთო ფერები, ვიზუალურად ძალიან ლამაზია, თვალი არ იღლება, დიდი ასოებია. უბრალოდ საჭიროა ვარჯიში.
მომზადდა რადიო იმედის გადაცემის — „გამოცდებიდან გამოცდებამდე“
თეიკო ანჯაფარიძესთან ერთად, მიხედვით
მოამზადა ლალი თვალაბეიშვილმა
|