2015-12-10 სიახლე მაშინ არის კარგი, როცა რაღაცას აუმჯობესებ გვესაუბრება შეფასებისა და გამოცდების
ეროვნული ცენტრის
ისტორიის ჯგუფის წარმომადგენელი
მიხეილ ბახტაძე
2016 წლის ერთიან ეროვნულ გამოცდებზე, ისტორიის ტესტური დავალების ტიპები იგივე დარჩება, რაც 2015 წელს იყო. ამ მხრივ, კარდინალური ცვლილება არ იგეგმება.
2015 წელს შევამცირეთ მაქსიმალური ქულა — იყო 80 ქულა და 70-ზე ჩამოვიყვანეთ. ამ ცვლილებამ გაამართლა იმ თვალსაზრისით, რომ აბიტურიენტებმა უფრო კომფორტულად იგრძნეს თავი, რადგან მეტი დრო ჰქონდათ, დავალებების რაოდენობა კი ნაკლები იყო და უფრო მშვიდად იმუშავეს. ვფიქრობ, სწორი ნაბიჯი გადავდგით. ახლა ამის გაკეთება უკვე საჭირო აღარ არის და არც ვგეგმავთ. ქულების რაოდენობა ისევ 70 იქნება.
რაც შეეხება დროს, შესაძლოა ელექტრონულ ფორმაზე მუშაობისას აბიტურიენტებს მეტი დრო დასჭირდეთ, მაგრამ, ამ ეტაპზე დროის გაზრდას არ ვფიქრობთ — ორსაათ-ნახევარი გრძელდებოდა ისტორიის გამოცდა, რაც სავსებით საკმარისი იყო. ფაქტობრივად, ყველა აპლიკანტი, საათ-ნახევარში ან 2 საათში, ამთავრებდა ტესტს.
არც შინაარსობრივ ნაწილში იგეგმება რაიმე სიახლე. როგორიც იყო საგამოცდო პროგრამა 2015 წლისთვის, იგივე იქნება 2016 წელსაც.
ნაწილობრივ ელექტრონულ ფორმატზე გადასვლის გამო, დავალების ტესტს აბიტურიენტები მონიტორზე ნახავენ, პასუხების ფურცელი როგორიც იყო, ისეთი დარჩება. პასუხების დაფიქსირება მათ პასუხების ფურცელში მოუწევთ და ისევე გასწორდება, როგორც აქამდე სწორდებოდა. ამ მხრივ არავითარი სიახლე არ იქნება.
სიახლე იქნება მხოლოდ ის, რომ თუ აქამდე ტესტი ბუკლეტის სახით ჰქონდათ, ახლა მონიტორის ეკრანზე იხილავენ. ტესტების ელექტრონული ვერსიები უკვე გამოქვეყნებულია ცენტრის ვებგვერდზე. აქვეა გარკვეული რეკომენდაციები და რჩევები აბიტურიენტებისთვის, მაგალითად: თუ გსურთ პასუხების ფურცელზე მონიშნული პასუხის გადასწორება, მთლიანად გააფერადეთ უჯრა, მაგრამ, ამავე დროს, შეუძლებელია, ხელმეორედ აირჩიოთ ის პასუხი, რომელიც გადაასწორეთ. ეს ჩანაწერი დავალების პირველ ტიპს ეხება, ე.წ. არჩევითბოლოიან დავალებას, როდესაც არის კითხვა და 4 სავარაუდო პასუხი. ამ შემთხვევაში, აპლიკანტებმა უჯრაში უნდა ჩაწერონ პასუხი. თუ ჩათვლიან, რომ ის უჯრა, რომელშიც ხ ნიშანი ჩაწერეს, არ არის მართებული, შეუძლიათ მთლიანად შავად გააფერადონ. მერე თუ მოიფიქრებენ, რომ ის პასუხი სწორი იყო, ვეღარ მიუბრუნდებიან. ასეთ შემთხვევაში, ალბათ, მოუწევთ პასუხის ფურცლის გამოცვლა. ამიტომ, ჯობია ნუ იჩქარებენ პასუხის წაშლას, კიდევ ერთხელ გადაამოწმონ, რამდენად ზუსტად აქვთ გაცემული პასუხი და მერე მიიღონ გადაწყვეტილება. ეს, როგორც გითხარით, პირველი ტიპის დავალებას ეხება.
დანარჩენი ტიპის დავალებებში მათ შეუძლიათ გადაშალონ ძველი და ჩაწერონ ახალი პასუხი, ოღონდ უნდა ჩაწერონ ისე, რომ გარკვევით ჩანდეს და გამსწორებელმა შეძლოს წაკითხვა.
ერთ-ერთი ინსტრუქცია ასეთია: წერეთ გარკვევით და იმყოფინეთ პასუხებისთვის განკუთვნილი ადგილი. აბიტურიენტებმა უნდა იცოდნენ, პირველი — თუ გაურკვევლად წერეს, უბრალოდ, ვერ შევძლებთ ნამუშევრის წაკითხვას და მეორე — ადგილი, რომელსაც მათ პასუხის ჩასაწერად ვაძლევთ, სრულიად საკმარისია. თუ იმაზე მეტს წერენ, შემდეგ, პასუხების ფურცლის ტექნიკურად დამუშავებისას, თითოეული დავალება იჭრება გარკვეულ ზომაზე და, თუ ამ ზომის ფარგლებს გარეთ გადის პასუხი, მისი წაკითხვა რთულია. რა თქმა უნდა, ვახერხებთ, მაგრამ იქმნება გარკვეული ტექნიკური პრობლემები. ამიტომ ჯობია, იმყოფინონ ის ადგილი, რაც გამოყოფილია, წერონ გარკვევით და, რაც მთავარია, აზრი ჩამოაყალიბონ ზუსტად და სრულად. არის შემთხვევები, როცა დავალებებში, სადაც მათგან მოვითხოვთ არგუმენტირებულ მსჯელობას და საკუთარი პოზიციის დაფიქსირებას, იწყებენ მსჯელობას, მაგრამ აღარ ასრულებენ. ამ შემთხვევაში, გამსწორებლისთვის გაურკვეველი რჩება, რისი თქმა სურდა აპლიკანტს — აზრი დაწყებულია, მაგრამ არ არის დასრულებული. ამ შემთხვევაში, არასრულყოფილ პასუხს ვერ ვაფასებთ. ინსტრუქციაშიც ხაზგასმული გვაქვს — პასუხი გაეცით კონკრეტული და ამომწურავი. აბიტურიენტებმა ეს აუცილებლად უნდა გაითვალისწინონ. მოცულობას მნიშვნელობა არ აქვს, მთავარია აზრი იყოს დასრულებული და გამსწორებელი რომ წაიკითხავს, მიხვდეს რაზეა საუბარი.
შავი სამუშაოსთვის აბიტურიენტებს დაურიგდებათ ფურცლები. აქამდე ისინი იყენებდნენ თავისუფალ ადგილებს ტესტის ბუკლეტში. რადგან ახლა ბუკლეტი აღარ ექნებათ და დავალებებს ეკრანზე ნახავენ, ბუნებრივია, შავი სამუშაოსათვის დაურიგდებათ ფურცლები, სადაც ჩაწერენ სავარაუდო პასუხს, მოხაზავენ და შემდეგ პასუხების ფურცელში გადაიტანენ.
გეოგრაფიის გამოცდისთვის მოსამზადებლად, აბიტურიენტებმა უნდა გამოიყენონ ხჳ-ხჳჳ კლასების სახელმძღვანელოები, რომლებიც გრიფირებულია განათლების სამინისტროს მიერ და რომლებიც გამოიყენება ჩვენს ზოგადსაგანმანათლებლო სკოლებში. არსებობს ალტერნატივები — მე-11 კლასში არის 2 სახელმძღვანელო, მე-12 კლასშიც — 2. არანაირი მნიშვნელობა არ აქვს, რომელს აირჩევენ. აიღონ ის სახელმძღვანელო, რომლითაც სკოლაში სწავლობენ. არის შემთხვევები, როდესაც სკოლის მასწავლებლები ან ახლობლები ურჩევენ სხვა წიგნს თუ სახელმძღვანელოს. რა თქმა უნდა, რაც უფრო მეტ წიგნს წაიკითხავენ, უკეთესია, მეტი ეცოდინებათ და უფრო განათლებულები იქნებიან, მაგრამ გამოცდისთვის სავსებით საკმარისია სკოლის სახელმძღვანელოები — ხჳ-ხჳჳ კლასების ნებისმიერი ალტერნატივა. კიდევ ერთხელ გავიმეორებ, რომ აბიტურიენტებმა უნდა ისწავლონ იმ სახელმძღვანელოებით, რომლებიც მათ სკოლაში აქვთ და, ამ მხრივ, არანაირი პრობლემა არ ექნებათ.
აბიტურიენტებს ვურჩევ, პირველ რიგში, არ იჩქარონ. ჰგონიათ ხოლმე, რომ ისტორიის ტესტი მარტივია, უცებ წაიკითხავენ და არ უკვირდებიან, რას ვეკითხებით. ნუ იჩქარებენ, მშვიდად, წყნარად წაიკითხონ, დაუფიქრდნენ, რას ვეკითხებით და შესაბამისად გვიპასუხონ.
რატომღაც ილუსტრაციები იწვევს მათ შიშს, არადა საშიში არაფერია. თავს იმით იმართლებენ ხოლმე, რომ ეს ილუსტრაცია სკოლის წიგნში არ იყო. ჩვენ არ ვამოწმებთ ილუსტრაციებს სკოლის წიგნში, ამის ცოდნა მათ ევალებათ — უნდა იცოდნენ წყაროს ანალიზი. წყარო არ არის მხოლოდ წერილობითი, არის ვიზუალურიც (იგივე ილუსტრაცია). აპლიკანტებს უნდა შეეძლოთ ილუსტრაციიდან ინფორმაციის ამოღება. რასაც ჩვენ ვეკითხებით, იმის პასუხი ილუსტრაციაში დევს, უბრალოდ საჭიროა დაკვირვება, ინფორმაციის მოძიება, შემდეგ გადამუშავება, გააზრება და პასუხების ფურცელში დაწერა. საკმაოდ ადვილი დავალებაა. ასე რომ, ნუ ეშინიათ.
მესამე წელია, რაც ეს დავალება გვაქვს, ასე რომ, ახალი არ არის. პრობლემა, ჩემი აზრით, იმაში მდგომარეობს, რომ, სამწუხაროდ, მასწავლებელთა ნაწილი ამ ტიპის დავალებებზე მუშაობას ყურადღებას არ აქცევს. ძირითადად, ძველი მეთოდით მუშაობენ — იყენებენ წერილობით წყაროებს. იმას, რომ ილუსტრაციაც — პლაკატი, აფიშა, რუკა — წყაროა და ძალიან საინტერესო ინფორმაციებს შეიცავს, ყურადღებას არ აქცევენ. აი, ეს არის პრობლემა, ამ მხრივ არ მიმდინარეობს მუშაობა.
გვაქვს დავალების ერთი ტიპი, რომელშიც სიტუაციის მოდელირებას ვახდენთ და ვთხოვთ აბიტურიენტს, მოიყვანოს არგუმენტები: 1 — მომხრის, 1 — მოწინააღმდეგის. მან უნდა იცოდეს, როგორი იყო ფაქტობრივი ვითარება და ამის შემდეგ უნდა წამოაყენოს არგუმენტები. ეს 2-ქულიანი დავალებაა — ერთი ქულა არის მომხრის არგუმენტის, მეორე — მოწინააღმდეგის. გვქონდა შემთხვევები, როდესაც ტესტში ამ ტიპის ერთი დავალება გვქონდა, იყო შემთხვევები, როცა ორი იყო. 2016 წელს რამდენი იქნება, ზუსტად ვერ გეტყვით, მაგრამ ამ ტიპის დავალება აუცილებლად იქნება.
როდესაც წერილობითი წყაროს ანალიზს ვაძლევთ, იქაც ვითხოვთ აბიტურიენტისგან საკუთარი პოზიციის გამოხატვას და არგუმენტის მოყვანას. იგივე ხდება, ვთქვათ, რუკაზე მუშაობისას, ასე რომ, დაახლოებით 5-6 კითხვაა, რომელიც აბიტურიენტისგან მოითხოვს, იმ ფაქტობრივი ცოდნის ბაზაზე, რაც მას აქვს, შეძლოს ამ ყველაფრის კრიტიკულად გააზრება და ამა თუ იმ ფაქტისადმი ან მოვლენისადმი საკუთარი დამოკიდებულების არგუმენტირებულად გადმოცემა. გასწორებისას ყურადღება ექცევა არა იმას, გამსწორებელი იზიარებს თუ არა აპლიკანტის მოსაზრებას, არამედ იმას, რამდენად სწორია მისი არგუმენტი, რამდენად ლოგიკურად გადმოსცემს მას და, რაც მთავარია, აბიტურიენტმა არ უნდა დაუშვას ფაქტობრივი შეცდომა. როგორც კი აპლიკანტები ფაქტობრივ შეცდომას უშვებენ, მათი პასუხი ნულდება. ფაქტობრივი შეცდომის დაშვების შემთხვევაში, ცხადია, არგუმენტიც უკვე არ იქნება ლოგიკური.
გასწორების პროცესი წელს ისევე წარიმართება, როგორც წინა წლებში. ნაშრომი ორჯერ სწორდება და იმ შემთხვევაში, თუ არის განსხვავება პირველ და მეორე გამსწორებელს შორის, მიდის მესამე გამსწორებელთან. გარდა ამისა, ჩვენ უკვე აღვნიშნეთ, რომ აპლიკანტებს შეუძლიათ ნახონ თავიანთი ნაშრომი — ნახონ ტესტიც და შეფასების სქემაც. თუ მაინც ეჭვი შეეპარებათ იმაში, რომ მათი ნაშრომი არაობიექტურადაა შეფასებული, შეუძლიათ გააპროტესტონ და კიდევ ერთხელ, მეოთხედ, გასწორდება საპროტესტო კომისიის მიერ.
რაც შეეხება პედაგოგთა გამოცდებს, არანაირ ცვლილებას არ ვგეგმავთ. ვინც აქამდე ჩააბარა ისტორიის გამოცდა და ვინც იანვარში ჩააბარებს — ერთი ტიპის გამოცდა უნდა ჩააბარონ, ამიტომ რაიმე რევოლუციურ სიახლეს მათ ვერ შევთავაზებთ. ამ მხრივ, პედაგოგებს შეუძლიათ მშვიდად იყვნენ. იქნება მხოლოდ ის, რაც ამდენი წელია ბარდება და მათთვის კარგად უნდა იყოს ნაცნობი.
სიახლე არც საატესტატო გამოცდებზე იგეგმება, პროგრამა იგივეა, რაც შარშან იყო. რა ტიპის დავალებები იყო გასულ წლებში, ამის ნახვა მსურველებს ჩვენს ვებგვერდზე შეუძლიათ.
ზოგადად, სიახლის შეთავაზება თვითმიზანი არ არის, სიახლე კარგია, როცა რაღაცას აუმჯობესებ. ჩვენ შემთხვევაში, ვფიქრობთ, ის, რაც გვაქვს, ამ ეტაპზე, წაყენებულ მოთხოვნებს აკმაყოფილებს.
მოამზადა ლალი თვალაბეიშვილმა
|