2016-04-14 პედაგოგები მეთოდიკის საკითხებს აღარ ჩააბარებენ ცვლილება საგნობრივ ტესტებში პედაგოგთა საგნობრივ საგამოცდო ტესტში ცვლილება შევიდა — მიმდინარე წლის ივლისში გამოცდაზე გასული პედაგოგები სწავლების მეთოდიკის საკითხებს, რაც ტესტის, დაახლოებით, 30%-ს შეადგენდა, აღარ ჩააბარებენ. ამ ცვლილების შესახებ გვესაუბრება შეფასებისა და გამოცდების ეროვნული ცენტრის ზოგადი უნარების ჯგუფის ხელმძღვანელი სოფო დოლიძე:
— აქამდე არსებული ტესტი ამოწმებდა როგორც საგნობრივ, ისე მეთოდიკის ცოდნას. მეთოდიკის ცოდნის ნაწილში, სხვადასხვა ტესტში, ცხადია, დავალებათა რაოდენობა განსხვავებული იყო, მაგრამ, მიახლოებით, ეს ნაწილი ყველა ტესტის 30%-ს შეადგენდა. მასწავლებელთა პროფესიული განვითარების ახალი სქემის ფარგლებში ასეთი მოდელი შემუშავდა — მივცეთ პედაგოგებს საშუალება, ტრენინგებითა და სხვადასხვა აქტივობებით, აიმაღლონ კვალიფიკაცია და ნუღარ შევამოწმებთ მეთოდიკის ცოდნას ტესტირებით. მართალი გითხრათ, ახლა ზუსტად ვერ გეტყვით როგორ შეამოწმებს მასწავლებელთა გავნითარების ცენტრი თუ სხვა ინსტიტუცია პედაგოგების ცოდნას მეთოდურ ნაწილში. ამ ეტაპზე ასეთი ვითარება გვაქვს — შევუმოწმოთ პედაგოგებსა და პედაგოგობის მსურველებს საგნის ცოდნა და შემდეგ მივცეთ საშუალება, შეიძინონ მეთოდური ცოდნა. მაგალითად, თუ ვარ მათემატიკოსი და არასოდეს მისწავლებია სკოლაში, შემიძლია უნივერსიტეტში გავიარო 60-კრედიტიანი სპეციალური პროგრამა, სადაც მასწავლიან, როგორ უნდა ვასწავლო. ამის საფუძველზე შევძლებ შემდეგ ჩემი საქმიანობის განხორციელებას, ვიმუშავებ მასწავლებლად. მოქმედ მასწავლებლებს, წესით და რიგით, უნდა ჰქონდეთ შესაძლებლობა, სხვადასხვა აქტივობით და ტრენინგ-პროგრამებით, გაიღრმავონ ცოდნა მეთოდიკაში. პროფესიული განვითარების სქემაც სწორედ ამას ითვალისწინებს — პედაგოგმა კვალიფიკაცია აიმაღლოს მრავალფეროვანი აქტივობების საფუძველზე, წლების განმავლობაში, სხვადასხვა საფეხურზე გადანაცვლებით. ტესტი ერთნაირი იქნება როგორც მოქმედი მასწავლებლებისთვის, ისე მასწავლებლობის მსურველებისთვის.
— მასწავლებლების ნაწილი, მათ შორის, ისინი, ვინც ჩააბარა საგნის გამოცდა, ამბობს, რომ ტესტი რთულია. მაგალითად, დაწყებითი საფეხურის მათემატიკის მასწავლებლებს განსაკუთრებით გაუჭირდათ ის ნაწილი, რომელიც ესეს წერას მოითხოვს. მათ მიაჩნიათ, რომ ამის ცოდნა ცუდი არ არის, თუმცა, არც აუცილებელია, რადგან პრაქტიკაში მისი გამოყენება არ უწევთ. თქვენი აზრით, რატომ უნდა ჩააბარონ მათ ესე?
— დაწყებითი საგნის მასწავლებლები აბარებენ საგნობრივ ცოდნას მათემატიკაში, რაც 9 კლასის მათემატიკის ცოდნას არ სცილდება, პლუს აკადემიური უნარების ნაწილი, რომელშიც შედის ესე. თუმცა, ეს არ არის მეთოდიკა და შესაბამისად, არ იქნება ამოღებული. ეს უნარების ნაწილია, რომელიც პედაგოგმა უნდა იცოდეს იმისთვის, რომ შეძლოს პირველკლასელთან ურთიერთობა, ასწავლოს მცირე ტექსტის შექმნა და წაკითხვა. ამას ასწავლიან როგორც მათემატიკის, ისე ქართულისა და სხვა საგნის მასწავლებლები. იმისთვის, რომ ბავშვს ვასწავლოთ, პირველ რიგში, ჩვენ თვითონ უნდა ვიყოთ კომპეტენტურები და შეგვეძლოს ამის კეთება. ამიტომ არის მოცემული აკადემიური უნარების ნაწილში წაკითხულის გააზრება და თხზულების კომპონენტები, ანალიტიკური წერის კომპონენტები. ეს კომპონენტები ტესტში დარჩება, რადგან ეს, კიდევ გავიმეორებ, არ არის მეთოდიკა, ეს არის ჩემი უნარი მივიღო ახალი ცოდნა და ინფორმაცია, გამოვთქვა აზრი მწყობრად, ლოგიკურად და გამართულად. პრინციპში, ეს მნიშვნელოვანია სწავლების ყველა ეტაპზე, განსაკუთრებით — დაწყებით საფეხურზე, რადგან სწორედ დაწყებითი კლასების მასწავლებელმა უნდა განუვითაროს მოსწავლეს ეს უნარი. შესაბამისად, ჩვენ დარწმუნებული უნდა ვიყოთ, რომ ეს უნარები მათ თვითონ კარგად აქვთ განვითარებული.
— შემცირდება თუ არა მეთოდიკის ამოღების ხარჯზე საგამოცდო ტესტის მოცულობა?
— ის, რომ ტესტში მეთოდიკის ნაწილი აღარ იქნება, არ ნიშნავს, რომ ტესტი ავტომატურად 30%-ით შემცირდება. ის, ნაწილობრივ მაინც, საგნობრივი ცოდნის კომპონენტებით შეივსება. მაგალითად, დაწყებითი საგნის მასწავლებლების შემთხვევაში, 100-ქულიანი ტესტი ჳ- ჳვ კლასების მასწავლებლებისათვის 80-ქულიანი გახდება; მათემატიკის, ქართულის და ბუნებისმეტყველების მასწავლებლების 80-ქულიანი ტესტები — 65-ქულიანი. როგორც ხედავთ, 30%-ზე ნაკლებით შემცირდება და დარჩენილი ნაწილი საგნობრივი კომპონენტებით შეივსება.
ესაუბრა ლალი ჯელაძე
|