2016-05-12
„მასწავლებელი — მეგზური ევროპისკენ“
ლალი ჯელაძე
ევროპის დღეების ფარგლებში, ნატოსა და ევროკავშირის საინფორმაციო ცენტრის ორგანიზებით, მასწავლებელთა პროფესიული განვითარების ეროვნული ცენტრისა და ფრიდრიხ ებერტის ფონდის მხარდაჭერით, მასწავლებლის სახლში 2-დღიანი კონფერენცია „მასწავლებელი — მეგზური ევროპისკენ“ ჩატარდა. პროექტი 2014 წელს შეიქმნა და ევროპული ღირებულებების პოპულარიზაციისა და ზოგადსაგანმანათლებლო სისტემაში დანერგვის მიზნით სემინარებსა და კონკურსებს ახორციელებს.
კონფერენცია საქართველოს სახელმწიფო მინისტრმა ევროპულ და ევროატლანტიკურ სტრუქტურებში ინტეგრაციის საკითხებში დავით ბაქრაძემ, ესტონეთის საგანგებო და სრულუფლებიანმა ელჩმა საქართველოში პრიიტ ტურკმა, ფრიდრიხ ებერტის ფონდის წარმომადგენლობის დირექტორმა საქართველოში ია თიკანაძემ, საქართველოს განათლებისა და მეცნიერების მინისტრის მოადგილემ თამაზ მარსაგიშვილმა და მასწავლებელთა პროფესიული განვითარების ეროვნული ცენტრის დირექტორმა გიორგი მაჩაბელმა გახსნეს.
კონფერენციის მიზანია მასწავლებლებმა მიიღონ ინფორმაცია საქართველოს ევროკავშირში ინტეგრაციის მნიშვნელობისა და პერსპექტივების შესახებ, გაეცნონ იმ შესაძლებლობებს, რომლებსაც ევროპული პროექტები მათ სთავაზობს. ასევე, გაზიარებული გამოცდილება და მიღებული ცოდნა დანერგონ სასწავლო პროცესში.
სემინარში მონაწილეობისთვის მასწავლებელთა პროფესიული განვითარების ეროვნულმა ცენტრმა რეგისტრაცია აპრილის თვეში გამოაცხადა, რომლის შედეგადაც თბილისიდან და რეგიონებიდან გეოგრაფიის, ისტორიისა და სამოქალაქო განათლების 110 პედაგოგი შეირჩა. აღნიშნულმა პედაგოგებმა ევროკავშირის თემატიკის დანერგვისა და ევროპული ღირებულებების პოპულარიზაციის მიზნით, საინტერესო პროექტები წარადგინეს.
ნინო მაღრაძე-ჯანჯღავა, ნატოსა და ევროკავშირის შესახებ საინფორმაციო ცენტრის მთავარი სპეციალისტი: „უკვე მესამე წელია, რაც ხორციელდება პროექტი „მასწავლებელი — მეგზური ევროპისკენ“. ზოგადად ეს პროექტი ორ ეტაპად ნაწილდება, პირველი გულისხმობს ორდღიან სემინარს, შემდეგი ეტაპი — ამ პროექტებზე მუშაობას და კონკურსის გამოცხადებას. დღეს დასრულდა პროექტის პირველი ნაწილი — ორდღიანი სემინარი. ფაქტობრივად, ხვალიდან უკვე ვიწყებთ მეორე ეტაპზე მუშაობას, ანუ ველოდებით შერჩეული 100-ვე მასწავლებლისგან აქტივობას, პროექტების გამოგზავნას. იმედი გვაქვს, აქტივობა მომავალშიც ისეთივე მაღალი იქნება, როგორიც წელს გვქონდა. შემოვიდა 85 პროექტი, 10 გამარჯვებული შეირჩა, მათგან 2 პედაგოგი თბილისის სკოლებიდან, ხოლო 8 პედაგოგი — რეგიონებიდან. ათივე გამარჯვებული დააჯილდოვა ევროკავშირის წარმომადგენელმა საქართველოში და ესტონეთის საელჩომ ერთკვირიანი ვიზიტით, ხოლო ჩვენმა სამინისტრომ და ცენტრმა — სერტიფიკატებით. 10 გამარჯვებული მასწავლებელი ესტონეთში, ტალინში გაემგზავრება ერთი კვირით. ისინი შეხვდებიან ესტონეთის საჯარო და კერძო სკოლების მასწავლებლებს, რომლებიც თავიანთ გამცდილებას გაუზიარებენ ქართველ კოლეგებს. 10 გამარჯვებულიდან 7 საჯარო სკოლის, ხოლო 3 კერძო სკოლის პედაგოგია. ამიტომ, ძალიან საინტერესო და სასარგებლო იქნება ორივე ტიპის სკოლის პედაგოგებთან შეხვედრა.
მინდა ვისარგებლო შემთხვევით და მადლობა გადავუხადო დამფინანსებელ ორგანიზაციებს — ებერტის ფონდი უკვე სამი წელია აფინანსებს ამ ძალიან საინტერესო ღონისძიება-სემინარს, ასევე ჩვენი თანამდგომია ევროპულ და ევროატლანტიკურ სტრუქტურებში ინტეგრაციის სამინისტრო და მასწავლებელთა სახლი.“
რაც შეეხება სემინარის თემებს, რა თქმა უნდა, ევროკავშირსა და ნატოს ეხება, უფრო მეტად ევროკავშირის მიმართულებითაა დატვირთული — ევროკავშირი-საქართველოს ურთიერთობები და პერსპექტივები. ასევე, ნატო და მისი მოლოდინები — რა ეტაპზე ვიმყოფებით დღეს. სემინარზე ოთხი ძირითადი თემა იშლება — რელიგია, ეკოლოგია, ადამიანის უფლებები და განათლება, რომელზეც მასწავლებლებმა, სემინარის მეორე დღეს, ჯგუფურად იმუშავეს — პედაგოგები 4 ჯგუფად დაიყვნენ, 25 მონაწილე თითო ჯგუფში, მათ დახმარებას ინსტრუქტორები უწევდნენ. სემინარის დასასრულს პრეზენტაციებით შეაჯამეს ფორუმი.
კონფერენციაზე გამოვლინდა პროექტის 10 გამარჯვებული მასწავლებელი, ისინი ესტონეთში სასწავლო კურსს გაივლიან მსმენელებად. მასწავლებლები საქართველოს მასშტაბით შეირჩნენ — 60 პედაგოგი სხვადასხვა რეგიონიდან, 40 — თბილისიდან. როგორც ქალბატონმა ნინო მაღრაძემ აღნიშნა, უპირატესობას საჯარო სკოლის მასწავლებლებს არ ანიჭებდნენ, სწორედ ამიტომაცაა შერჩეული 100 მასწავლებლიდან ნაწილი კერძო სკოლის პედაგოგი, ხოლო10 გამარჯვებულიდან — 3.
ათ საუკეთესო მასწავლებელს შორის პირველი ადგილი საჩხერის N2 საჯარო სკოლის სამოქალაქო განათლების მასწავლებელმა ლიკა გომართელმა აიღო (ის ამავე სკოლის დირექტორია), პროექტში მომხსენებლად მონაწილეობა მისთვის ერთი კრედიტქულის მომტანია. მის მიერ წარმოდგენილი პროექტი საკმაოდ მასშტაბურია როგორც მონაწილეებით, ისე ღონისძიებებით — ჩართული იყო, დაახლოებით, 200 მოსწავლე — VIII-XI კლასები და პროექტის ხელმძღვანელის გარდა, კიდევ სამმა პედაგოგმა იმუშავა: მზია დეკანოიძე, ქართული ენისა და ლიტერატურის მასწავლებელი, ირმა იაკობაშვილი, ისტორიის მასწავლებელი, ია ნებიერიძე, სამოქალაქო განათლების მასწავლებელი. კრედიტქულების მინიჭების გარდა, რით არის პროექტი საინტერესო და როგორ მიმდინარეობდა პროცესი მთელი წლის განმავლობაში, ამის შესახებ გვესაუბრა ლიკა გომართელი: „როგორც იცით, სემინარში მონაწილეობენ ისტორიის, გეოგრაფიის და სამოქალაქო განათლების მასწავლებლები, მათ რიცხვს წელს ქართული ენისა და ლიტერატურის მასწავლებლებიც დაემატნენ. ეს პროექტი საშუალებას გვაძლევს, მოსწავლეებს დავანახოთ რა არის ევროპული ღირებულებები და რატომ ვიღებთ გეზს ევროპისაკენ, რატომ უნდა დავნერგოთ ევროპული ღირებულებები ჩვენს ცხოვრებაში, რათა გავხდეთ ევროპის მოქალაქეები.
გასულ წელს მე თვითონ სემინარის მსმენელი ვიყავი, ძალიან ბევრი ინფორმაცია მივიღე, ამასთან ერთად ჩაგვიტარდა ვორქშოპები, მოგვეცა მითითებები, რომლის შემდეგ მზად ვიყავით პროექტის განხორციელება სკოლაში დაგვეწყო. მარტიდან დავგეგმეთ პროექტი, რომელიც, ფაქტობრივად, ერთი წელი მიმდინარეობდა და რომლის ფარგლებში ძალიან ბევრი აქტივობა განვახორციელეთ. მოსწავლეებმა გამოიკვლიეს საქართველოს ისტორიაში სად გვხვდება ევროპული ღირებულებები; როდის ვიყავით ევროპის ნაწილი და როდის დავკარგეთ ეს ღირებულებები, რა უნდა გავაკეთოთ იმისთვის, რომ ისევ დავუბრუნდეთ ევროპის კულტურულ ოჯახს. ბავშვებმა ქართულ მწერლობაში (საპროგრამო თუ არასაპროგრამო) თავად მოიძიეს ამ თემატიკის ამსახველი ნაწარმოებები. პროცესი, დაახლოებით, სამი თვე გაგრძელდა. ამის შემდეგ გადავედით სასკოლო ცხოვრებაში ევროპული ღირებულებებისა და ფასეულობების დანერგვაზე. კონკრეტულად კი, ამისთვის ჩამოვაყალიბეთ „ლიდერ გოგონათა სკოლა“, მათ ჩავუტარეთ ტრენინგები, ჰქონდათ შეხვედრები ლიდერ ქალებთან, ასევე ვაჩვენეთ ფილმები მათ შესახებ. შემდეგ „ლიდერმა გოგონებმა“ დანარჩენი აქტივობები სკოლაში განახორციელეს. იმისთვის, რომ სასკოლო საზოგადოებაში დემოკრატიული ღირებულებებისადმი ინტერესი გაგვეღვიძებინა, მთელი წლის განმავლობაში, ჩავატარეთ სხვადასხვა სახის ღონისძიებები — ნახატების კონკურსი თემაზე: „ევროკავშირში ქართული ღირებულებებითა და ტრადიციებით“; ესეების კონკურსი „ჩემი ევროპული ღირებულებები“ და ფოტოკონკურსი „მე ვარ ევროპელი“. ვცდილობდით, ევროპული ღირებულებებისადმი სამოქალაქო ცნობიერება არა მხოლოდ მოსწავლეებში, არამედ თემშიც აგვემაღლებინა. ამ მიმართულებით ჩავატარეთ ადამიანის უფლებების დაცვისადმი მიძღვნილი კვირეული, აღვნიშნეთ ყველა საერთაშორისო დღე, რომელთა მიმართაც მოქალაქეების ცნობიერება შედარებით დაბალია, მაგალითად, დაუნის სინდრომის დღე, აუტიზმის ცნობადობის ამაღლების დღე და ა.შ. ჩვენთან ფუნქციონირებს შშმ პირთა დღის ცენტრი და ერთ-ერთი ღონისძიება სწორედ ამ ცენტრის ბენეფიციართა და ჩვენი სკოლის მოსწავლეთა ერთობლივი მონაწილეობით ჩატარდა. ასევე, მთელი წლის განმავლობაში ვაგროვებდით მაკულატურას, რომელიც სასკოლო ბიბლიოთეკის გასაახლებლად გამოვიყენეთ. წყლის დაცვის საერთაშორისო დღე მდინარე ჩიხურას მიდამოების გაწმენდით აღვნიშნეთ.
პროექტი დასრულდა იმით, რომ მოვიძიეთ სკოლის კურსდამთავრებულები, რომლებმაც ევროპაში მიიღეს განათლება, ასეთი მასწავლებლებიც გვყავს. ბავშვებმა მათთან ინტერვიუები ჩაწერეს. გავხსენით ევროპის კუთხე, სადაც მათი ფოტოები განთავსდა წარწერით, თუ რა არის მათთვის ევროპული ღირებულება. ეს კუთხე, სიმბოლურად, კიბის უჯრედების ქვეშ განთავსდა, რადგან ევროპისკენ გზა სწორედ საფეხურეობრივად უნდა გავიაროთ.“
ფორუმის ორგანიზატორი, „საინფორმაციო ცენტრის ნატოსა და ევროკავშირის შესახებ“ დირექტორის მოადგილე გიორგი ფარეშიშვილი, მიიჩნევს: „აუცილებელია, მსოფლიოში ყველა სახელმწიფომ გაითავისოს, რომ მასწავლებელი უნდა იყოს ყველაზე დაფასებული ადამიანი, რადგანაც მას მომავალი თაობების ღირსეულად და სწორად აღზრდის პირდაპირი მოვალეობა აკისრია. ჩვენი ქვეყანა ევროინტეგრაციის გზას ადგას, აქედან გამომდინარე, განსაკუთრებით მნიშვნელოვანია, პედაგოგებს მივაწოდოთ ზუსტი და დროული ინფორმაცია ყველა იმ სიახლესა და მიმდინარე პროექტზე, რომელსაც ჩვენი სახელმწიფო ამ მიმართულებით ახორციელებს, რათა მათ შეძლონ თავიანთ სკოლებში მოსწავლეებს ზუსტი ინფორმაცია მიაწოდონ აღნიშნულ საკითხებზე. სემინარის ფარგლებში, მასწავლებლებს საშუალება ეძლევათ, შეხვდნენ ცნობილ და ავტორიტეტულ ექსპერტებს, თანამდებობის პირებს, რომლებიც უშუალოდ არიან ჩართული იმ პროცესებში, რასაც ასოცირების ხელშეკრულება და ევროინტეგრაცია გულისხმობს, შესაბამისად, ნებისმიერ კითხვაზე პასუხს ისინი უშუალოდ მათგან მოისმენენ. იმედია, მასწავლებლები თავიანთ სკოლებს, მოსწავლეებსა თუ კოლეგებს ახალი და სასარგებლო ინფორმაციით დაუბრუნდებიან.“
|
