2014-03-06 „მოძრავი ბიბლიოთეკის“ მსვლელობა გრძელდება
მაკა ყიფიანი
არასამთავრობო ორგანიზაცია — ასოციაცია „ზეკარის“ პროექტი „სოფლის სკოლის ბიბლიოთეკა წიგნიერების შანსია“ — გრძელდება. ამბროლაურის მუნიციპალიტეტის სასტუმრო „სილოვანის“ საკონფერენციო დარბაზში, ასოციაცია „ზეკარმა“, ორგანიზება გაუკეთა ჳ-ჳვ კლასის მოსწავლეებისთვის „მოძრავი ბიბლიოთეკის“ გამოფენას და საბავშვო მწერალ — თამარ ადამიასთან შეხვედრას. ღონისძიებას ესწრებოდნენ ამბროლაურის პირველი და მეორე სკოლის დაწყებითი კლასების მოსწავლეები და პედაგოგები, ამბროლაურის მუნიციპალიტეტის ბიბლიოთეკის დირექტორი და თანამშრომლები. თებერვლის თვეში ასოციაცია „ზეკარის“ „მოძრავი ბიბლიოთეკა“ ონის და ცაგერის მუნიციპალიტეტების სოფლის სკოლებს (ორბელი, ალპანა, უწერა და შეუბანი) სტუმრობდა. მოსწავლეებისთვის ერთნაირად საინტერესო იყო „მოძრავი ბიბლიოთეკის“ წიგნების გაცნობა და შეხვედრა საბავშვო მწერალთან. ონის, ამბროლაურის და ცაგერის რესურსცენტრების უფროსებმა უშუალოდ მიიღეს მონაწილეობა სასკოლო აქტივობებში. პროექტის ფარგლებში გათვალისწინებული სასკოლო ვიზიტები და „მოძრავი ბიბლიოთეკის“ პრეზენტაცია ამბროლაურის მუნიციპალიტეტის სოფელ კვაცხუთის, წესის და ნიკორწმინდის საჯარო სკოლებიდან დაიწყო.
მანანა ბოჭორიშვილი, პროექტის ხელმძღვანელი: „მოძრავი ბიბლიოთეკისთვის“ შევიძინეთ ილუსტრირებული მხატვრული ლიტერატურა. მოსწავლეთა ცნობისმოყვარეობაზე და ანალიტიკურ აზროვნებაზე გათვლილი შემეცნებითი, წარმოსახვითი და შემოქმედებითი აზროვნების წყაროდ მიჩნეული ვიზუალური და მუსიკალური ალბომები. სამიზნე სკოლებში „მოძრავი ბიბლიოთეკის“ პრეზენტაციაზე მოსული მოსწავლეების დაუფარავმა ემოციამ და შთაბეჭდილებებმა კიდევ უფრო დაგვარწმუნა იმაში, რომ ნახევრად დაცლილ სოფლის სკოლებს ჰაერივით სჭირდებათ სასკოლო ბიბლიოთეკები. ძნელია გადმოსცე მოსწავლეთა ემოცია და ინტერესი, რომელსაც ისინი გამოფენაზე წარმოდგენილი წიგნების მიმართ იჩენდნენ. წარმოიდგინეთ, ჩვენ წინ დგას პატარა ცისფერთვალება პირველკლასელი გოგონა, გულში ჩაუკრავს დიდი ვარდისფერი ალბომი „ყველაფერი პრინცესების შესახებ“ და ჩურჩულებს: „ვოცნებობ ეს ვარდისფერი წიგნი ჩემი გახდეს“. ეს ის შემთხვევაა, როცა ოცნება ხდება. ასეთი შთაბეჭდილებების შემდეგ ძნელია არ დაეთანხმო განათლების სპეციალისტებს, რომლებიც სასკოლო ბიბლიოთეკის როლზე, მნიშვნელობასა და აუცილებლობაზე საუბრობენ. ასოციაცია „ზეკარი“ მზადაა, ხელი შეუწყოს მსურველ სკოლებს, რათა ისარგებლონ „მოძრავი ბიბლიოთეკით“. ასოციაცია გეგმავს დაწყებითი კლასების მასწავლებელთა გადამზადებას. პედაგოგები გაივლიან პრაქტიკულ სემინარს, რომელიც დაეხმარება მათ საგაკვეთილო პროცესში დაამკვიდრონ ისეთი აქტივობები, როგორიცაა: წიგნის პრეზენტაცია, წაკითხული ტექსტის მიხედვით დიორამების დამზადება, ტექსტში აღწერილი პროცესებისა და სტრუქტურების მოდელირება და ა.შ. ამბროლაურის, ცაგერის და ონის რესურსცენტრების დახმარებით, რაჭა-ლეჩხუმის სოფლის სკოლის მოსწავლეებისთვის, სულ მალე, გამოვაცხადებთ სხვადასხვა კონკურსს, მასში მონაწილე და გამარჯვებული მოსწავლეები და სკოლები დასაჩუქრდებიან წიგნებით“.
კახა რეხვიაშვილი, ამბროლაურის მუნიციპალიტეტის რესურსცენტრის უფროსი: „არასამთავრობო ორგანიზაცია — ასოციაცია „ზეკარის“ მიერ განხორციელებული პროექტი „სოფლის სკოლის ბიბლიოთეკა წიგნიერების შანსია“ ძალზე მნიშვნელოვანია, რადგან ხელს შეუწყობს რაჭა-ლეჩხუმის სოფლებში სასკოლო ბიბლიოთეკების განახლება-გამდიდრებას. აქედან გამომდინარე, გაიზრდება წიგნის ხელმისაწვდომობა მოსწავლე ახალგაზრდობისათვის, რაც უდავოდ მისასალმებელია და წინ გადადგმული ნაბიჯია, წიგნს ხომ, სულიერ საზრდოს, მოზარდთა აღზრდასა და ჩამოყალიბებაში დიდი მნიშვნელობა ენიჭება“.
მანანა ნატმელაძე, ამბროლაურის მუნიციპალიტეტის სოფელ კვაცხუთის საჯარო სკოლის დირექტორი: „ჩვენი ამოცანა წიგნიერი თაობის აღზრდაა. ამიტომაცაა პროექტი „სოფლის სკოლის ბიბლიოთეკა წიგნიერების შანსია“ ჩვენი სკოლისთვის მისაღები და ძალზე მნიშვნელოვანი. მსგავსი პროექტების განხორციელება, მასში მოსწავლეების ჩართვა, სასკოლო და საკლასო ბიბლიოთეკების მოწყობა და განახლება კომპიუტერულ თაობას წიგნისკენ შემოაბრუნებს. მივესალმები ჩვენი სკოლის სამიზნედ არჩევას, დიდ მადლობას ვუხდი პროექტის ინიციატორს და ხელმძღვანელს მანანა ბოჭორიშვილს, რომელიც სერიოზული პრობლემის გადაჭრაში გვეხმარება“.
მარიამ გელოვნიშვილი, კვაცხუთის საჯარო სკოლის IV კლასის მოსწავლე: „პროექტის ფარგლებში სკოლაში სტუმრად საბავშვო მწერალი თამარ ადამია გვეწვია, რომელიც გვესაუბრა თავის ნაწარმოებებზე. მისი წიგნებიდან ყველაზე მეტად მომეწონა შემეცნებითი ზღაპრები. ის ლამაზად ილუსტრირებული და საინტერესოა. მწერალმა ჩვენ მიერ დასმულ უამრავ შეკითხვას უპასუხა. მასთან შეხვედრა ჩემთვის დაუვიწყარი იქნება“.
ელენე კილასონია, კვაცხუთის საჯარო სკოლის V კლასის მოსწავლე: „მოძრავი ბიბლიოთეკის“ გამოფენამ, უდიდესი შთბეჭდილება მოახდინა ჩემზე. საბავშვო მწერალ თამარ ადამიასთან შეხვედრით კი აღფრთოვანებული დავრჩი. მწერალი საინტერესო თემებზე გვესაუბრა, დიდი სითბო და სიყვარული გამოხატა ჩვენ მიმართ. გვითხრა, რომ შემოქმედებითი ნიჭით დაჯილდოებულ ბავშვებს შესაძლებლობა ეძლევათ მონაწილეობა მიიღონ პროექტში, რომელსაც ასოციაცია „ზეკარი“ ახორციელებს, რამაც ძალიან გაგვახარა“.
რუსუდან რეხვიაშვილი, სოფელ წესის საჯარო სკოლის დირექტორი: „ჩვენს სკოლაში სასწავლო-შემეცნებითი და მხატვრული ლიტერატურის გამოფენამ და მოსწავლეებთნ შესახვედრად მოსულმა საბავშვო მწერალმა, ქალბატონმა თამარ ადამიამ წარუშლელი შთაბეჭდილება მოახდინა თითოეულზე. სოფელში მცხოვრები ბავშვები მსგავსი შეხვედრებით და ღონისძიებებით არ არიან განებივრებულნი, ამიტომ მათთვის ამ დღეს განსაკუთრებული მნიშვნელობა ჰქონდა. დიდი მადლობა ქალბატონ მანანა ბოჭორიშვილს ასეთი მნიშვნელოვანი პროექტის განხორციელებისთვის“.
ეკატერინე მელაშვილი, სოფელ წესის საჯარო სკოლის V კლასის მოსწავლე: „მე და ჩემი თანაკლასელები დიდი სიხარულით შევხვდით მწერალ თამარ ადამიას. როცა მის წიგნებს ვკითხულობდი, სულ მაინტერესებდა, როგორი ადამიანი იყო მწერალი, როგორ წერდა მოთხრობებს, ზღაპრებს, ყველასაგან განსხვავებული მეგონა. მისი სკოლაში სტუმრობა და გაცნობა ძალიან გამიხარდა. მისმა საუბარმა ჩემზე დიდი შთაბეჭდილება მოახდინა. ეს ლამაზი და საინტერესო დღე არასოდეს დამავიწყდება“.
გიგი ნატმელაძე, სოფელ წესისVI კლასის მოსწავლე: „სკოლაში მოწყობილმა სასწავლო-შემეცნებითი და მხატვრული ლიტერატურის გამოფენამ ჩემზე უდიდესი შთაბეჭდილება მოახდინა. არასოდეს მინახავს ერთად ამდენი საინტერესო და ფერადი ნახატებით გაფორმებული წიგნი. საბავშვო მწერალთან შეხვედრა და საუბარი ძალიან საინტერესო იყო“.
ელენე კერესელიძე, სოფელ წესისVIII კლასის მოსწავლე: „დიდი ინტერესით ველოდებოდი საბავშვო მწერალთან შეხვედრას. მისი რამდენიმე ზღაპარი წაკითხული მაქვს. რატომღაც მეგონა, მწერალი ასაკოვანი ქალბატონი იქნებოდა, მაგრამ ის ისეთი ახალგაზრდა და ლამაზი აღმოჩნდა, რომ გაოცებული დავრჩი. მასთან საუბარი ძალიან საინტერესო იყო. გვიამბო, თუ როგორ გახდა მწერალი, გაგვაცნო თავისი ნაწარმოებები. მასთან შეხვედრა ძალიან დიდხანს მემახსოვრება. დიდი მადლობა იმ ადამიანებს, რომლებმაც ასეთი დაუვიწყარი და ლამაზი დღე გვაჩუქეს“.
ეკა კობახიძე, სოფელ ნიკორწმინდის საჯარო სკოლის დირექტორის მ.შ.: „მოგეხსენებათ, სოფელში, განსაკუთრებით კი მთის რეგიონში, ინტერნეტი (რაც ძირითადი მიზეზია ხოლმე წიგნისადმი ინტერესის დაკარგვის) ძნელად მისაწვდომია, თუმცა ამისდა მიუხედავად, რატომღაც, წიგნისადმი სიყვარული ბავშვებში აქაც ძალიან მცირეა. პროექტის ფარგლებში განხორციელებული ღონისძიებები, ვფიქრობ, მოსწავლეებში წიგნიერების გაღრმავებას შეუწყობს ხელს. საბავშვო მწერლის, ქალბატონ თამარ ადამიას სკოლაში სტუმრობა ჩვენი მოსწავლეებისთვის ნამდვილი დღესასწაული იყო. პატარებს განსაკუთრებით მოეწონათ მისი „მხიარული დედაენა“. მაღალკლასელი მოსწავლეებისთვის კი მწერალთან საუბარი და მათთვის გამოცდილების გაზიარება კარგი გაკვეთილი იყო. ჩვენი სკოლის მოსწავლეების, პედაგოგების და მშობლების სახელით დიდი მადლობა მინდა გადავუხადო პროექტის ხელმძღვანელს, ქალბატონ მანანა ბოჭორიშვილს და მინდა ვისურვო, რომ მსგავსი შეხვედრები და ღონისძიებები ჩვენს სკოლაში ტრადიციად დამკვიდრდეს“.
ელენე ნებულიშვილი, სოფელ ნიკორწმინდის საჯარო სკოლის XI კლასის მოსწავლე: „ქალაბატონ თამარ ადამიასთან შეხვედრამ ყოველგვარ მოლოდინს გადააჭარბა. სინტერესო იყო მასთან საუბარი. მან შეძლო ჩვენში წიგნისადმი ინტერესის გაღვიძება. ძალიან დიდი შთაბეჭდილება მოახდინა ჩემზე „მოძრავი ბიბლიოთეკის“ პრეზენტაციამ. ვისურვებდი, მსგავსი შეხვედრები კიდევ ბევრჯერ იყოს ჩვენს სკოლაში, ჩვენთვის ამას ძალიან დიდი მნიშვნელობა აქვს“.
ნათია გურგენიძე, სოფელ ნიკორწმინდის საჯარო სკოლის X კლასის მოსწავლე: „პროექტის — „სოფლის სკოლის ბიბლიოთეკა წიგნიერების შანსია“ — ჩვენ სკოლაში პრეზენტაციამ განსაკუთრებული შთაბეჭდილება მოახდინა. გამოფენაზე წარმოდგენილ უამრავ წიგნს, მეგობრებთან ერთად, დიდი გულისყურით ვათვალიერებდი და ვეცნობოდი. საბავშვო მწერალთან შეხვედრა ძალიან საინტერესო და მნიშვნელოვანი იყო. მასთან საუბრისა და საინტერესო რჩევების შემდეგ, მე და ჩემს მეგობრებს გაგვიჩნდა სურვილი, თავადაც შევქმნათ ნაწარმოებები. მოხარული ვიქნები, თუკი მსგავსი შეხვედრები და ღონისძიებები კიდევ ბევრჯერ მოეწყობა ჩვენს სკოლაში“.
|