2016-03-10 „ტრენერთა სკოლა“ — ამბიციური განაცხადი ხარისხზე
მასწავლებელთა პროფესიული განვითარების ეროვნული ცენტრის „მასწავლებელთა და სკოლის დირექტორთა პროფესიული განვითარების პროექტის“ ფარგლებში „ტრენერთა სკოლა“ ამოქმედდა, რომელიც კვალიფიციური, სერტიფიცირებული ტრენერების მომზადებასა და გადამზადებას უზრუნველყოფს. სკოლამ უკვე დაიწყო მსურველთა რეგისტრაცია ტრენერთა მომზადების ზოგად კურსზე. თუ რას ითვალისწინებს ზოგადი კურსი და საერთოდ, რამ გამოიწვია ტრენერთა სკოლის ჩამოყალიბების აუცილებლობა და რა არის მისი მიზანი — ამის შესახებ გვესაუბრება მასწავლებელთა და სკოლის დირექტორთა პროფესიული განვითარების პროგრამის მენეჯერი ირინა აბულაძე:
— ცენტრის ინტერესი, ზოგადად, მაღალკვალიფიციურ ტრენერებთან თანამშრომლობაა, თუმცა, არა მხოლოდ ჩვენს ცენტრს, ზოგადად სფეროს სჭირდება მაღალკვალიფიციური ტრენერები, ამიტომაც დღის წესრიგში დადგა „ტრენერთა სკოლის“ ჩამოყალიბების თემა. მიუხედავად იმისა, რომ ცენტრი ნამდვილად არ არის ორიენტირებული იმაზე, რომ მხოლოდ თავად იყოს ქვეყანაში მსურველთათვის ტრენინგის შემთავაზებელი, ჩვენი როლი ამაშიც გამოიკვეთა — სხვა ტრენინგ-პროვაიდერებს დავეხმაროთ მომზადებული ტრენერების შეთავაზებით, ჩვენ მიერ მომზადებული ადამიანური რესურსი მათთვისაც ხელმისაწვდომი გავხადოთ. ჩვენი საბოლოო მიზანია, არსებობდეს რაც შეიძლება მეტი რესურსი, რომელიც იმუშავებს მასწავლებლების, დირექტორებისა და სკოლაში დასაქმებული კადრების პროფესიულ განვითარებაზე. ამიტომ, ამ დიდ მიზანთან რომ მივიდეთ, რაც შეიძლება მეტი მაღალკვალიფიციური კადრი უნდა გვყავდეს როგორც თბილისში, ისე რეგიონში.
შევიმუშავეთ „ტრენერთა სკოლის“ კონცეფცია, რომელიც გულისხმობს როგორც ახალი ტრენერების მომზადებას, ისე უკვე არსებული ტრენერების გადამზადებას და მათ პროფესიულ განვითარებას. ბოლო წლებში, ცენტრს, დაახლოებით, 300 ტრენერთან (შესაძლოა უფრო მეტიც) უთანამშრომლია. მაგრამ ამ ხნის განმავლობაში, როგორც გაირკვა, მათ პროფესიული განვითარების შესაძლებლობა არ ჰქონდათ, თუ არ ჩავთვლით მათ მომზადებას კონკრეტულ მოდულში. ტრენერთა მომზადებასა და პროფესიულ განვითარებაზე ზრუნვის ასეთი გრძელვადიანი ხედვა აქამდე არ არსებობდა.
— როგორ უნდა გახდე ტრენერი — ვინ შეიძლება დარეგისტრირდეს და რა კრიტერიუმებით შეირჩევიან მსურველები?
— კურსი განსაზღვრულია იმ პირებისთვის, რომლებსაც საერთოდ არ აქვთ ან აქვთ 2 წელზე ნაკლები ტრენერობის გამოცდილება. იმისათვის, რომ მსურველმა კურსი გაიაროს, მინიმუმ, მაგისტრის ან მასთან გათანაბრებული აკადემიური ხარისხი უნდა ჰქონდეს, ასევე სწავლების გამოცდილება ან ზოგადსაგანმანათლებლო ორგანიზაციის მართვის გამოცდილება, ან სკოლის დირექტორის სერტიფიკატი. პრიორიტეტი მიენიჭება პირებს, რომლებიც აკადემიურ ხარისხს განათლების, ჰუმანიტარულ (ინგლისური), სოციალურ (ფსიქოლოგია) ან საბუნებისმეტყველო მეცნიერებებში ფლობენ.
კურსის გავლის მსურველები შერჩევის ორეტაპიან პროცესს გაივლიან:
პირველ ეტაპზე, დაინტერესებული პირი მასწავლებელთა პროფესიული განვითარების ეროვნული ცენტრის ვებგვერდზე გაივლის ონლაინ რეგისტრაციას, ხოლო მეორე ეტაპზე, კანდიდატების მიერ წარმოდგენილი დოკუმენტაციის და საკვალიფიკაციო მოთხოვნების შესაბამისობის დადგენის შემდეგ, კანდიდატი დაიშვება ჯგუფურ ან ინდივიდუალურ გასაუბრებაზე, რომლის წარმატებით გავლის შემდეგ, ტრენერის მომზადების ზოგად კურსში ჩაერთვება.
ისევე როგორც ჩვენთვის, ყველა მსგავსი ტიპის ორგანიზაციისთვის მნიშნველოვანია, რომ ადამიანს, რომელსაც ტრენინგზე უშვებს, ცოდნის გადაცემის კომპეტენცია და უნარი ჰქონდეს. თუ გავითვალისწინებთ, რომ მთლიანად გვინდა მოვიცვათ მასწავლებელთა 65-ათასიანი არმია, ყველა სკოლის დირექტორი და ა.შ., ამ უნარების მქონე ბევრი ტრენერი დაგვჭირდება, რომლებიც, შესაძლოა, არა მაინცდამაინც ამ ცენტრში, არამედ ნებისმიერ ადგილას დასაქმდნენ ან ამ ტიპის საქმიანობას ეწეოდენ, როგორც კოლეგები. აქცენტს სწორედ იმაზე ვაკეთებთ, რომ პროფესიული განვითარება ურთიერთთანამშრომლობით გახდეს უფრო მიმზიდველი და არა მხოლოდ ფორმალიზებული მეთოდებით. ამიტომ, ადამიანები, რომლებსაც ახლა მოვამზადებთ, ვფიქრობთ, მომავალში არა მხოლოდ ჩვენს ცენტრთან, არამედ ნებისმიერ პროვაიდერთან ითანამშრომლებენ. შესაძლოა, ისინი სკოლის წიაღში დასაქმებული ადამიანები იყვნენ — მასწავლებლები, მაგრამ ტრენერობის უნარ-ჩვევებით, ან კარგი ფასილიტატორები, ან კარგი დირექტორები, ასევე ტრენერობის კომპეტენციებით, მათთვის ეს უნარ-ჩვევები კიდევ უფრო საჭირო და აუცილებელია.
— უფრო კონკრეტულად რას ითვალისწინებს ტრენერების მომზადების კურსის პირველი ეტაპი და რა მოდულებისგან შედგება?
— კურსი ითვალისწინებს ტრენერთა კომპეტენციების ჩარჩოთი განსაზღვრული ცოდნის გადაცემას, პროფესიული უნარ-ჩვევების განვითარებას და დამოკიდებულებების ჩამოყალიბებას, რომლებიც აუცილებელია ხარისხიანი ტრენინგის დაგეგმვისა და ჩატარებისთვის.
კურსი სამი მოდულისგან შედგება: ზრდასრულთა სწავლების პრინციპები; ეფექტური კომუნიკაცია და ჯგუფის დინამიკა; მოდულის დაგეგმვა, შეფასება და განვითარება. მონაწილეები სერტიფიკატს მიიღებენ კურსის დასრულებისა და შეფასების პროცესის წარმატებით გავლის შემთხვევაში.
საერთო ჯამში, კურსი, დაახლოებით, 80-საათიანია — საკონტაქტო და არასაკონტაქტო საათების რაოდენობით, თან ახლავს საკითხავი მასალაც. ტრენინგები იმის გათვალისწინებით დაიგეგმება, რომ ტრენერობის მსურველებს ძირითად საქმიანობაში ხელი არ შეეშალოთ.
პირველ ეტაპზე, რეგისტრაცია თბილისში, ბათუმში, თელავში, ზუგდიდსა და რუსთავში დაიწყება — რასაკვირველია, თუკი ამის ინტერესი იქნა. მსურველს შეუძლია შევიდეს სარეგისტრაციო გვერდზე და ჩამოთვლილი ქალაქებიდან მისთვის სასურველი ადგილი მიუთითოს, სად სურს ტრენინგის გავლა. იმ შემთხვევაში, თუ თითოეულ ქალაქში რეგისტრაციის მსურველთა საკმაო რაოდენობა დაგროვდება, ტრენინგი ადგილობრივად ჩატარდება.
ჩვენი გაცხადებული პრიორიტეტია — ადამიანური რესურსების განვითარება რეგიონულად, ადგილზე განხორციელდეს. არანაირად არ გვაქვს იმის ინტერესი, რომ მუდმივად თბილისში იყოს მობილიზებული ისეთი კადრი, რომელიც წავა და ტრენინგებს ჩაატარებს რეგიონებისთვის. ის ადამიანები, რომლებიც ამ კურსებს გაივლიან და ტრენერის უნარ-ჩვევებს შეიძენენ, თავისივე რეგიონის რესურსცენტრების, უმაღლესი სასწავლებლების თუ სხვა დაწესებულებების თანამშრომლები იქნებიან, შესაბამისად, ისევ თავიანთ რეგიონებში იმუშავებენ ფორმალიზებული თუ არაფორმალიზებული გზით, როგორც ოფიციალურად დასაქმებული ტრენერები ან, თავიანთი საქმიანობის ფარგლებში, ტრენერების უნარებით.
ჩემი აზრით, მნიშვნელოვანია, გავზარდოთ რეგიონული დაფარვა, რაც იმას ნიშნავს, რომ მეტი ადამიანური რესურსი განვავითაროთ რეგიონში. ყველაფერს რომ თავი დავანებოთ, ეს ზოგადად სერვისის გაუმჯობესებას შეუწყობს ხელს — უფრო სწრაფი, უფრო ეფექტური, ნაკლები ხარჯით. რაც უფრო მეტ ინვესტიციას ჩავდებთ ადამიანური კაპიტალის განვითარებაში, მით მეტი ამონაგები გვექნება გარკვეული პერიოდის განმავლობაში, ეკონომიკური განვითარების კუთხითაც.
— ტრენერთა სკოლის ამოქმედება ათასწლეულის ფონდის მიერ დაფინანსებულ ახალ პროექტს უკავშირდება, რომელიც სკოლის დირექტორთა და STჶმ დარგების მიმართულებით მასწავლებელთა პროფესიულ განვითარებას გულისხმობს. „ტრენერთა სკოლაც“ ამავე პროგრამის ფარგლებში ფინანსდება?
— ტრენერთა სკოლის კონცეფცია შემუშავებული მანამდეც გვქონდა, მაგრამ მის უფრო სწრაფად განხორციელებას ხელი შეუწყო ახალმა პროექტმა — „სკოლის დირექტორთა და მასწავლებელთა პროფესიული განვითარების პროგრამამ“, რომელიც ათასწლეულის გამოწვევის კორპორაციის ფინანსური მხარდაჭერით და ათასწლეულის გამოწვევის ფონდის საქართველოსთან თანამშრომლობით ხორციელდება. ამ პროექტის ფარგლებში, მოიაზრება, 2019 წლამდე, ვჳჳ-ხჳჳ კლასების მასწავლებლების STჶმ დარგების მიმართულებით გადამზადება და ასევე — ყველა საჯარო სკოლის დირექტორისა და თითო ფასილიტატორის. გადამზადებაში ვგულისხმობთ არა მხოლოდ ტრენინგებს, არამედ გრძელვადიან კურსს, რომელიც შედგება: კონკრეტულად ტრენინგისგან, მასალების მიწოდებისგან, ასევე, სხვადასხვა სასწავლო შეხვედრებისგან (ჯგუფებში თემატიკის განხილვა). ბევრი კომპონენტი და საშუალებაა, რომ, საბოლოო ჯამში, მომზადებული კადრები მივიღოთ. დირექტორების შემთხვევაში, ეს არის ლიდერობის აკადემიები როგორც თბილისში, ისე რეგიონულად; მასწავლებლების შემთხვევაში კი — რამდენიმესაფეხურიანი მომზადება როგორც ტრენინგით, ისე სხვადასხვა საშუალებებით. შესაბამისად, ვინაიდან დარწმუნებული უნდა ვიყოთ, რომ პროფესიული განვითარების გრძელვადიანი კურსები, რომელსაც უცხოელ კოლეგებთან ერთად შევიმუშავებთ, მაღალხარისხიანი და კარგი ეფექტის მომტანი იქნება, მნიშვნელოვანია, გვყავდეს კარგი ტრენერები, რომლებიც ფასილიტაციას გაუწევენ ან წარუძღვებიან ადგილებზე ტრენინგებს. ამიტომაც, სავსებით ლოგიკურად, ამ პროგრამამ ტრენერთა მომზადებისა და გადამზადების კომპონენტი აიღო. აქედან გამომდინარე, მოსამზადებელ კურსზე შერჩეული კანდიდატების დაფინანსებას „ათასწლეულის გამოწვევის ფონდისა“ და მასწავლებელთა პროფესიული განვითარების ეროვნული ცენტრის „მასწავლებელთა და სკოლის დირექტორთა პროფესიული განვითარების პროექტი“ უზრუნველყოფს.
რეალურად, ტრენერთა სკოლის კონცეფციის განხორციელების შესაძლებლობა „ათასწლეულის გამოწვევის ფონდის“ ფინანსურმა მხარდაჭერამ მოგვცა და შეიძლება ითქვას, რომ ტრენერთა სკოლა სწორედ ამ კონკრეტული პროექტის მხარდაჭერით და მისივე მიზნებისთვის ავამოქმედეთ. მაგრამ იქიდან გამომდინარე, რომ ჩვენ ამ პროცესების საკმაოდ სტრუქტურიზებული მონიტორინგი გვექნება და რეალურად მოდელსაც გამოვცდით, მომავალში, ცენტრი მოიაზრებს, რომ ტრენერები, რომლებიც ხარისხობრივ შეფასებას გაივლიან, პრიორიტეტულად გამოვიყენოთ ცენტრის მიერ განხორციელებულ სხვა ტრენინგებშიც. ადამიანები, რომლებიც ამ პროექტის ფარგლებში გაივლიან სერტიფიცირებას, მხოლოდ ამ პროექტისთვის არ იმუშავებენ. ეს დამატებითი შესაძლებლობაა ცენტრისთვისაც, ხარისხობრივად უფრო მაღალ საფეხურზე აიწიოს, ტრენინგების მიწოდების თვალსაზრისით. ვფიქრობთ, საკმაოდ ამბიციური განაცხადია, როცა ვამბობთ, გარდა იმისა, რომ, საქართველოს მასშტაბით, მოვამზადებთ 20 ათას მასწავლებელს, ყველა საჯარო სკოლის დირექტორსა და თითო ფასილიტატორს, პლუს გვეყოლება რამდენიმე ასეული მაღალკვალიფიციური ტრენერი. საბოლოო ჯამში, ძალიან შთამბეჭდავ სურათს ველით, განსაკუთრებით რეგიონების კუთხით, რადგან ვვარაუდობთ, რომ ტრენერთა მომზადებისა და გადამზადების საერთო მონაცემებში, მინიმუმ, 30 პროცენტი რეგიონული დაფარვა იქნება.
— იმ შემთხვევაში, თუ ტრენერობის მსურველი მომზადების შემდეგ ეტაპზე გადასვლას არ ისურვებს, მიენიჭება თუ არა ტრენერის წოდება?
— ტრენერთა მომზადების შემდეგი ეტაპი იმ კონკრეტული მიმართულების მიხედვით განხორციელდება, რომლის ჩატარებაც პროექტის ფარგლებში მოუწევთ. ადამიანს, რომელიც მეორე ეტაპზე გადასვლის სურვილს არ გამოთქვამს, სერტიფიკატით დავუდასტურებთ პირველი ეტაპის ტრენერობას, რადგან ამ კურსის გავლის შემდეგ, მას უკვე ექნება ზოგადი კომპეტენციები — ზრდასრულთა სწავლების მეთოდები, კომუნიკაციის, ჯგუფის მართვისა და ტრენინგის დაგეგმვის უნარები. ხოლო მეორე ეტაპის გავლის შემდეგ, ტრენერი კონკრეტულად დირექტორთა და მასწავლებელთა გადასამზადებლად იქნება სპეციალიზებული. აქედან გამომდინარე, შეიძლება ასეთი ფორმულირება მივცეთ — პირველი ეტაპი მოამზადებს ზოგად ტრენერს, ხოლო მეორე ეტაპი — ზოგადი განათლების ტრენერს.
— „ტრენერთა სკოლის“ ამოქმედება კონკრეტული პროგრამის ფარგლებში დაიწყო. თუმცა, რეალურად, როგორც ირკვევა, პროექტის დასრულების შემდეგაც, მომზადების კურსი მრავალმხრივ შესაძლებლობებს მისცემს ცენტრს...
— დიახ, მომზადების კურსი, პროგრამის დასრულების შემდეგაც, ცენტრს აძლევს საშუალებას, ზოგადი განათლების ტრენერებად სერტიფიცირებული ადამიანები ჰყავდეს, რადგან კურსი, რომელსაც ტრენერები მომზადებისას გაივლიან, მთლიანად დაფარავს იმ ძირითად ბლოკს, რაც უნდა იცოდეს მასწავლებლის და დირექტორის ტრენერმა. ნებისმიერ შემთხვევაში, რა პროგრამის ფარგლებშიც უნდა ჩატარდეს ტრენინგი, საბოლოო ჯამში, ჩვენ შესაძლებლობა გვექნება, ეს მოდელი შემდგომშიც ვამუშაოთ. რაც მთავარია, შევძლებთ დავსვათ ხარისხის ნიშანი და ვთქვათ, რომ ტრენერებს გავლილი აქვთ არა მხოლოდ შერჩევის კონკურსი, არამედ რამდენიმე ეტაპიანი შერჩევა-გადამზადება და გვყავს მაღალი ხარისხისა და კვალიფიკაციის ტრენერები. შესაბამისად, შეგვიძლია ჩავატაროთ ასეთივე მაღალი ხარისხის ტრენინგები, მიუხედავად ადგილისა, იქნება ეს თელავში, ბათუმსა თუ თბილისში. უნდა ამოქმედდეს საერთო სტანდარტი და ძალიან დიდი იმედი მაქვს, რომ მოთხოვნები, რომლებიც ხანდახან გვესმის მასწავლებლების მხრიდან — „მაინცდამაინც ის კონკრეტული ტრენერი გამოგვიგზავნეთ“ — აღარ იქნება. საბოლოო ჯამში, ყველას უნდა ჰქონდეს განცდა (მიუხედავად იმისა, რომელ რეგიონში და რომელ სკოლაში ასწავლის), რომ თანაბარხარისხიან სერვისს მიიღებს ნებისმიერი პროვაიდერისგან და არა მხოლოდ ცენტრისგან. ეს სისტემური მიდგომის განხორციელების პირველი მცდელობაა, ასეთი შეთავაზება ჯერ არც ერთი სტრუქტურის დონეზე არ ყოფილა.
შემდეგ, მონიტორინგის შედეგად გამოკვეთილ ხარვეზებზე ვიმუშავებთ. რასაკვირველია, არ გვაქვს იმის ილუზია, რომ ორი-სამი კურსის შემდეგ, ყველა ტრენერი ერთ დონეზე მომზადებული გვეყოლება, რადგან თავად მათ შორისაც იქნება განსხვავება — ზოგს მეტი გამოცდილება აქვს, ზოგს — ნაკლები, ნაწილი საერთაშორისო სერტიფიკატის მფლობელია და ა.შ. მონიტორინგი მოგვცემს საშუალებას, ვნახოთ მათი პროფესიული განვითარების სუსტი და ძლიერი მხარეები და ამის მიხედვით ვიზრუნოთ წერტილოვან განვითარებაზე. საბოლოოდ, ამით სკოლის დირექტორებისა და მასწავლებლებისთვის რაც შეიძლება მაღალი ხარისხის სერვისის მიწოდებას უზრუნველვყოფთ.
აქვე გეტყვით იმასაც, რომ იგეგმება რეგიონებში „მასწავლებელთა სახლების“ გახსნა და, ვფიქრობთ, ამით კიდევ მეტად შევუწყობთ ხელს რეგიონულ განვითარებას. ეს ცენტრები პროფესიული განვითარების კერებად უნდა იქცეს. იქ მისულ მასწავლებელს თუ დირექტორს უნდა დახვდეს ჩამონათვალი — ვინ რა ტრენინგს სთავაზობს და არჩევანი თავად გააკეთოს ისე, რომ ხარისხში ეჭვი არ შეეპაროს. ისეთი გარემო უნდა შეიქმნას, რომ აღარ ჰქონდეთ განცდა — „რადგან თბილისში არ ვარ, ამით რაღაცას ვაკლდები“. ამდენად, რეგიონული განვითარებისთვის ამ ცენტრების გაჩენაც და ადამიანური რესურსის განვითარებაც უმნიშვნელოვანესია. ამიტომ, თავისი შესაძლებლობების განვითარებისთვის, ცენტრმა ისარგებლა ათასწლეულის ფონდის მხარდაჭერით და დავიწყეთ ადამიანური რესურსის განვითარება, გზადაგზა კიდევ გამოჩნდება სხვა საჭიროებები.
— როდის გამოაცხადებს „ტრენერთა სკოლა“ რეგისტრაციას იმ პირებისთვის, რომლებსაც ტრენერობის 2 წელზე მეტი გამოცდილება აქვთ და იქნება თუ არა მათი მოდულები განსხვავებული?
— განსხვავება ამ ორი ჯუგუფის მომზადებაში, რასაკვირველია, იქნება. დამწყებთათვის, როგორც გითხარით, უფრო გრძელვადიანი კურსი იქნება შეთავაზებული, ხოლო ორ წელზე მეტი გამოცდილების მქონე ტრენერებს — განსხვავებული ტიპის უფრო მოკლევადიან კურსს შევთავაზებთ, რომელზეც სწორედ ახლა მუშაობს ჩვენი უცხოელი კოლეგა. თავისთავად, მასაც ექნება თავისი სპეციფიკაცია და შეფასების მეთოდები, რომლითაც განვსაზღვრავთ, რამდენად არის მზად ესა თუ ის ტრენერი — ემთხვევა თუ არა მისი ღირებულებები ჩვენსას. პირველ რიგში, გამოიცდება, რამდენად აქვთ გააზრებული მოსწავლეზე ორიენტირებული სასწავლო პროცესი. შემდეგ განხორციელდება მონიტორინგი, როგორ ატარებენ ტრენინგებს, მონაწილეთაგან გვექნება უკუკავშირი.
რაც შეეხება მოდულებს, ამაზე უცხოელ ექსპერტთან ერთად ვმუშაობთ, თვის ბოლოს იგეგმება დასრულებაც და პილოტირებაც. 2 წელზე მეტი გამოცდილების მქონე ტრენერებისთვის, მარტის ბოლოს, ვგეგმავთ რეგისტრაციის გამოცხადებას.
— ისმის კრიტიკა, რომ, ტრენინგების მიმართულებით, ცენტრი კვლავ აპირებს მონოპოლიის ხელში აღებას, რას უპასუხებთ ამ ბრალდებას?
— ვფიქრობთ, ამ ადამიანების მომზადებითა თუ გადამზადებით, ჩვენ ბაზარს შევმატებთ დამატებით ადამიანურ რესურსს, რომლის გამოყენებასაც ისევე შეძლებენ სხვა პროვაიდერები, როგორც ცენტრი. ვთანამშრომლობთ განათლების ხარისხის განვითარების ცენტრთან, რომ დაიწყოს გარე პროვაიდერების აკრედიტაცია, ჩვენი ცენტრის გარდა, სხვამაც რომ შეძლოს ტრენინგების ჩატარება. ამ ეტაპზე კი, ჩვენ გვჭირდება ადამიანები, რომლებიც თავიანთ კოლეგებს, თანამშრომლებს, ახლობლებს, მეზობლებს და ა.შ. დაეხმარებიან პროფესიულ განვითარებაში, ამიტომ, არც ამის დრო გვაქვს და არც ფუფუნება, დავჯდეთ და ველოდოთ, რომ ამას ვიღაც სხვა გააკეთებს.
— დაბოლოს, ვინ იქნებიან „ტრენერთა სკოლის“ ტრენერები, ვის ანდეთ კვალიფიციური ტრენერების მომზადება?
— ზოგადი მომზადების კურსის ტრენერების ნაწილი შერჩეულია, გამოცხადებული კონკურსის საფუძველზე. მეორე ეტაპის ტრენინგებს კი ქართველი და უცხოელი ექსპერტები გაუძღვებიან.
მათ გაიარეს გადარჩევა — სასიგნალო ტრენინგები ჩაატარეს და შეფასდნენ. ბუნებრივია, ერთნაირი შედეგები არ გვაქვს, რამდენიმე კანდიდატმა უფრო მაღალი ხარისხი აჩვენა, ვიდრე დანარჩენებმა. შესაბამისად, ახლა ტრენინგების ჩატარებას სწორედ იმდენ წერტილში დავიწყებთ, რამდენშიც დარწმუნებული ვართ ტრენერთა მაღალკვალიფიციურობაში. ის ადამიანები კი, რომლებზეც ვფიქრობთ, რომ აკმაყოფილებენ ჩვენს სტანდარტს, მაგრამ მაინც სჭირდებათ გარკვეული მიმართულებით გაძლიერება, შემდეგ ჯგუფებს შეუერთდებიან.
ასე რომ, ჩვენ არ ვართ ორიენტირებული რაოდენობაზე. უმჯობესია, პირველ ეტაპზე, ნაკლები რაოდენობის ტრენერი მოვამზადოთ, მაგრამ ხარისხიანი. შემდეგ ეტაპზე კიდევ რამდენიმე ჯგუფს დავამატებთ. პრინციპში, ყველა რისკი გათვალისწინებულია, პირველ კურსს შერჩეული გუნდიდან საუკეთესოებს ვანდობთ, პარალელურ რეჟიმში კი, დანარჩენებთან, სუსტი მხარეების გასაძლიერებლად, გავაგრძელებთ მუშაობას, რომ შემდეგ ეტაპზე ისინიც უხარვეზოდ ჩაერთონ.
|