2017-06-29 ნიკოლოზ რაჭველი საქართველოში იუნისეფის ელჩი გახდა
ლალი ჯელაძე
26 ივნისს, საგანგებო ღონისძიებაზე, ნიკოლოზ რაჭველს, კომპოზიტორს, დირიჟორსა და საქართველოს ეროვნული სიმფონიური ორკესტრის სამხატვრო ხელმძღვანელს, საქართველოში გაეროს ბავშვთა ფონდის (იუნისეფის) ელჩის წოდება მიენიჭა. მის საქმიანობაში განსაკუთრებული ადგილი დაეთმობა ადვოკატირებას, შეზღუდული შესაძლებლობის მქონე ბავშვთა უფლებების დაცვისა და ბავშვთა მიმართ ძალადობის აღმოფხვრის მიზნით.
„მოხარულები ვართ, რომ ნიკოლოზ რაჭველი შემოუერთდა იუნისეფის გუნდს, მის მხარდამჭერებსა და ელჩებს — აღნიშნავს ლაილა ომარ გადი, გაეროს ბავშვთა ფონდის წარმომადგენელი საქართველოში — იგი აქტიურად თანამშრომლობს გაეროს ბავშვთა ფონდთან, ბოლო წლების განმავლობაში, ბავშვთა უფლებების შესახებ საზოგადოების ინფორმირების მიზნით, გვეხმარება კიდევ უფრო ფართო ფენებს მისწვდეს ჩვენი გზავნილი, რომ ყველა ბავშვი უნდა სარგებლობდეს თანაბარი უფლებებით და იყენებდეს საკუთარ პოტენციალს სტიგმისა და ძალადობისაგან თავისუფალ გარემოში. იმედი გვაქვს, ნიკოლოზ რაჭველის ძალისხმევა კვლავ დაგვეხმარება ადვოკატირებასა და საზოგადოების ცნობიერების ამაღლებაში, რომ საქართველოში დაცული იყოს ბავშვების უფლებები.“
„ჩემთვის ეს პატივია და უდიდესი პასუხისმგებლობა. ყველაფერს გავაკეთებ საქართველოში ყველაზე დაუცველი ბავშვების უფლებების ადვოკატირებისთვის.“ — ამბობს იუნისეფის ელჩი საქართველოში.
ელჩის ამპლუაში იგი დაეხმარება იუნისეფს შეზღუდული შესაძლებლობის მქონე ბავშვთა უფლებების დაცვასა და იმ ნეგატიური სოციალური ნორმების შეცვლაში, რომლებიც ხელს უწყობს ბავშვთა მიმართ ძალადობას.
ნიკოლოზ რაჭველი, 2014 წლიდან, ეხმარება გაეროს ბავშვთა ფონდს და კონცერტებისა და საჯარო გამოსვლების საშუალებით ცდილობს შეზღუდული შესაძლებლობის მქონე ბავშვების მხარდაჭერას და საზოგადოების ინფორმირებას ბავშვთა უფლებების შესახებ. წელს ნიკოლოზმა აქტიური მონაწილეობა მიიღო იუნისეფის საკომუნიკაციო კამპანიაში „დაინახე ყველა ფერი“, რომლის მიზანია შეზღუდული შესაძლებლობის მიმართ არსებული სტიგმის აღმოფხვრა.
„სტატუსის გარეშეც, მე და ჩემი მეგობრები, არაერთ კამპანიაში ვიყავით ჩართულები, რომლებიც ბავშვებს უკავშირდება და რომლებიც გაეროს ბავშვთა ფონდის ინიცირებით ხდება საქართველოში. მაგრამ, როცა უკვე სტატუსი გაქვს, პასუხისმგებლობაც გაცილებით დიდია. უფრო ღრმაა დამოკიდებულება და გაცნობიერება იმისა, თუ რა შეგიძლია გააკეთო ჩვენი ქვეყნის ბავშვების მომავლისთვის.“ — ამბობს იუნისეფის ელჩი საქართველოში.
გაეროს ბავშვთა ფონდი აფასებს ხელოვანთა კავშირის „კონცეპტ-არტ“, საქართველოს ეროვნული სიმფონიური ორკესტრის, ცნობილი ხელოვანების — ნინო მაჩაიძის, ლიზა ბათიაშვილის და დავით ალდაშვილის მონაწილეობას იუნისეფის საკომუნიკაციო კამპანიაში „დაინახე ყველა ფერი“.
იუნისეფის ელჩები, მთელ მსოფლიოში, თავიანთ შესაძლებლობებსა და აღიარებას იყენებენ იმისათვის, რომ საზოგადოებისა და მთავრობების ყურადღება მიაპყრონ ბავშვთა უფლებების დაცვას და თავიანთი წვლილი შეიტანონ ბავშვთა მდგომარეობის გაუმჯობესების საქმეში.
დენი ქეი პირველი იყო, ვინც 1954 წელს მიიღო საეთაშორისო ელჩის წოდება; მან მსოფლიოს მრავალ ქვეყანაში, მათ შორის განვითარებად ქვეყნებში, იმოგზაურა, რათა გაევრცელებინა ინფორმაცია ბავშვთა უფლებებზე. ამ საქმეს ის გარდაცვალებამდე, 1987 წლამდე, აგრძელებდა და დაამკვიდრა მნიშვნელოვანი სტანდარტები გაეროსა და იუნისეფის კეთილი ნების მომდევნო ელჩებისთვის. შემდეგ მას შეუერთდნენ ოდრი ჰეპბერნი და სხვ. ამჟამად არსებობს სრულიად გამორჩეული სია საერთაშორისო, რეგიონული და ეროვნული ელჩებისა.
იუნისეფის კეთილი ნების ელჩები არიან საქვეყნოდ ცნობილი მსახიობები და გამორჩეული ნიჭის ადამიანები: ქეითი პერი, სერენა უილიამსი, ლიამ ნისონი, ნოვაკ ჯოკოვიჩი, დევიდ ბექჰემი, ჰარი ბელაფონტე, ორლანდო ბლუმი, ვუპი გოლდბერგი, ლეო მესი, რიკი მარტინი, შაკირა, ვანესა რედგრეივი, სუზან სარანდონი, მია ფეროუ, სერჯიო რამოსი, ფრანჩესკო ტოტი, კლაუდია შიფერი, ევან მაქგრეგორი, რობინ უილიამსი, სარა ჯესიკა პარკერი და სხვები.
გაეროს ბავშვთა ფონდის ელჩები
რიკი მარტინი unicef-ის კეთილი ნების ელჩია და აქტიურადაა ჩაბმული ბავშვთა სექსუალური და შრომითი ექსპლუატაციის წინააღმდეგ ბრძოლის კამპანიაში: „მე მუშაობა ცხრა წლის ასაკში დავიწყე, მაგრამ ეს ჩემი არჩევანი იყო, — განაცხადა რიკი მარტინმა, — ამ ბავშვებს არა აქვთ არჩევანის შესაძლებლობა. ისინი იძულებით ხდებიან მონობის მსხვერპლი. ბავშვების ტრეფიკინგი გლობალური პრობლემაა, რომელიც ძალიან ბევრ ბავშვს შეეხო. ზოგიერთი მონაცემის მიხედვით, წელიწადში, ტრეფიკინგის მსხვერპლთა რაოდენობა ბავშვებში 1.2 მილიონს აჭარბებს. ხშირ შემთხვევაში, ბავშვები და მათი ოჯახის წევრები ვერ აცნობიერებენ ტრეფიკინგის საშიშროებას, რადგან ჰგონიათ, რომ დასაქმებისა და ცხოვრების უკეთესი პირობები მხოლოდ საზღვარგარეთაა.“
მისი აღმატებულება იორდანიის დედოფალი რანია, მსოფლიო ბავშვთა გულმოდგინე და გამოკვეთილი დამცველი, 2007 წლის იანვარში, დაინიშნა unicef-ის პირველ ბავშვთა საპატიო დამცველად.
დედოფალი რანია, დიდი ხნის განმავლობაში, მნიშვნელოვან მხარდაჭერას უწევდა unicef-ს და მის პროგრამებს იორდანიასა და მთელ მსოფლიოში. ის თან ახლდა unicef-ს პაკისტანში მიწისძვრით დაზარალებულთა დასახმარებლად, ინდოეთის სასწავლო ცენტრებში, არგენტინის, ბრაზილიისა და მაროკოს სკოლებში, რათა მხარი დაეჭირა ყველა ბავშვის, განსაკუთრებით, გოგონების ხარისხიანი განათლებით უზრუნველყოფისთვის.
დედოფალი რანია ცნობილია თავისი საჯარო მოწოდებებით, ყოველთვის, როდესაც ბავშვთა უსაფრთხოებას საერთაშორისო კრიზისი ემუქრება. ამის მაგალითად შეიძლება მოვიყვანოთ მისი საჯარო მოწოდებები 2008 წლის ღაზას კონფლიქტთან დაკავშირებით: „ჩვენი ადამიანობა არასრულფასოვანი ხდება, როდესაც ბავშვები, განურჩევლად ეროვნული წარმომავლობისა, სამხედრო ოპერაციების მსხვერპლი ხდებიან.“
იორდანიაში დედოფალმა, როგორც საოჯახო საქმეთა ეროვნული საბჭოს პრეზიდენტმა, შეიმუშავა ბავშვთა საკითხების გადაწყვეტაზე მიმართული ეროვნული სამოქმედო გეგმა, რომლის მიზანია მათი ცხოვრების დონის გაუმჯობესება ჯანდაცვის, ზოგადი განათლების და ძალადობის, ექსპლუატაციისაგან დაცვის უზრუნველყოფის გზით.
ბავშვების განათლების შესაძლებლობის ზრდის ხელშეწყობის მიზნით, მან ასევე დანიშნა სპეციალური პრემია თავის სამშობლოში. 2007 წელს კი, დაიწყო „მადრასატის“ განხორციელება, რაც გულისხმობს საჯარო სკოლების რეაბილიტაციას საჯარო, კერძო თუ არაკომერციული ორგანიზაციების ერთობლივი ძალისხმევით. ის ჩართულია იორდანიის საგანმანათლებლო ინიციატივაში, რომელიც 2003 წელს დაიწყო და წარმოადგენს ინოვაციურ ინტერნეტსწავლების პროგრამას, რომელიც ხელს უწყობს განათლების შესაძლებლობების ზრდას, ეფექტური ტექნოლოგიების გამოყენებით. ეს ინიციატივა ახლო აღმოსავლეთის სხვა ქვეყნებმაც გადაიღეს.
მსოფლიოში ცნობილი მომღერალი შაკირა მაბარაკი იუნისეფის კეთილი ნების ელჩად 2003 წლის 24 ოქტომბერს დაინიშნა. მას სწამს, როგორც ხელოვანს, შეუძლია ხელი შუწყოს საზოგადოების ცნობიერების ამაღლებას ადამიანის უფლებების საკითხებში: „მიმაჩნია, რომ მოვალე ვარ, ვისარგებლო შესაძლებლობებითა და პოპულარობით, რომელიც არტისტულმა კარიერამ მომიტანა, რათა ხალხის ყურადღება მივაპყრო რეალურ პრობლემებს რეალურ სამყაროში და შევიტანო წვლილი მათი გადაჭრის რეალური გზების პოვნაში. დარწმუნებული ვარ, დედამიწა უფრო მიმზიდველი გახდება საცხოვრებლად, თუ ყოველი ჩვენგანი იტვირთებს პასუხისმგებლობას სხვის ბედზე.“
შაკირამ დააფუძნა ფონდი „ჵies დescalzos“, რომელიც მის მშობლიურ კოლუმბიაში ეხმარება ადგილნაცვალ და მარგინალურ ბავშვებს სრულფასოვანი განათლების მიღებაში. საგანმანათლებლო აღჭურვილობის შეძენაზე მიმართული პროექტების გარდა, ფონდი ბავშვებს უზრუნველყოფს საკვებით და დამატებითი საგანმანათლებლო საქმიანობებით ხელოვნების, მუსიკის და რეკრეაციულ სფეროში. ასევე, ოჯახებს უქმნის ეკონომიკურ შესაძლებლობებს. გარდა ამ ფონდისა, შაკირა დამფუძნებელია ასევე „ბarefoot“ ფონდის (რომელიც მსოფლიო მასშტაბით მუშაობს განათლების უნივერსალურ ხელმისაწვდომობაზე) და თანადამფუძნებელი — ალაS-ისა, რომელიც იშიფრება, როგორც ლათინოამერიკელი მომღერლებისა და ბიზნესმენების მოძრაობა, რომელიც ადრეული ასაკის ბავშვების განვითარებაზე მუშაობს.
როგორც კეთილი ნების ელჩმა, შაკირამ, საჯარო მოხსენებების, თანხების მოძიებაში მონაწილეობის და unicef-ის ეროვნული კომიტეტის ეგიდით განხორციელებული სხვა საქმიანობების მეშვეობით, ხელი შეუწყო unicef-ის საქმიანობის პოპულარიზაციას და მოსახლეობის ცნობიერების დონის ამაღლებას ისეთ საკითხებში, როგორიცაა ჰჳვ/შიდსი, განათლება და ბავშვის დაცვა.
ფეხბურთის ბრიტანელ ვარსკვლავს, დევიდ ბექჰემს მილიონობით გულშემატკივარი ჰყავს მთელ მსოფლიოში. 2005 წლის 10 იანვარს, ინგლისის გუნდის ყოფილი კაპიტანი დაინიშნა unicef-ის კეთილი ნების ელჩად, სპორტის განვითარების პროგრამის ფარგლებში. ბექჰემმა unicef-ის ელჩობა მაშინ დაიწყო, როცა „მანჩესტერ იუნაითედის“ საფეხბურთო კლუბში თამაშობდა. 1999 წლის ნოემბერში, გუნდმა „unicef იუნაითედის“ სახელით დაიწყო თანამშრომლობა გაერთიანებული სამეფოს კომიტეტთან, რათა მოეზიდა თანხები unicef-ისთვის და გაევრცელებინა მის მისიასთან დაკავშირებული ინფორმაცია. ბექჰემი და მისი გუნდის წევრები აქტიურად ჩაერთვნენ unicef-ის კამპანიებსა და თანხების მოძიების საქმიანობებში, განათლებისა და რეკრეაციული პროგრამების ჩამოსაყალიბებლად, რაც მოიცავდა ბავშვებისთვის ფეხბურთის თამაშის შესაძლებლობას მთელ მსოფლიოში.
ელჩად დანიშვნის პირველივე დღეებში, ბექჰემი ეწვია იუნისეფის კოპენჰაგენის მარაგების (რეზერვების) განყოფილებას, რათა ენახა, თუ რა კეთდებოდა 2004 წლის ინდოეთის ოკეანის ცუნამის მიერ დაზარალებული ბავშვების დასახმარებლად.
ბექჰემი, ასევე, შეუერთდა კამპანიას „გავერთიანდეთ ბავშვებისთვის, გავერთიანდეთ შიდსის წინააღმდეგ“ და, მის ფარგლებში, მონაწილეობა მიიღო მთელ რიგ სარეკლამო კლიპში. გარდა ამისა, ამ კამპანიის მხარდასაჭერად, დევიდმა და მისმა მეუღლემ, ვიქტორია ბექჰემმა იუნისეფი შეარჩიეს მათ მიერ, 2006 წლის 21 მაისს, ორგანიზებული საქველმოქმედო საღამოს ბენეფიციარად.
unicef-ის მხარდამჭერ საქმიანობებს შორის მნიშვნელოვანია ბექჰემის ვიზიტი სიერრა ლიონეში 2008 წელს. ის მხარს უჭერდა unicef-ის 2008 წლის მსოფლიოს სახელმწიფოების ანგარიშს ბავშვთა დაცვის სფეროში, რომელშიც, ძირითადად, ბავშვების სიკვდილიანობა იყო აქცენტირებული.
ცნობილი მსახიობი და მატერიალური ხელოვნების ექსპერტი ჯეკი ჩანი, ჲნჳCჶფ-ის და ჲნაჳდS-ის კეთილი ნების ელჩად 2004 წლის აპრილში, კოლუმბიაში ვიზიტის დროს, დაინიშნა.
როგორც კეთილი ნების ელჩი, იგი აქტიურად უჭერს მხარს ჰჳვ/შიდსის წინააღმდეგ მიმართულ კამპანიას, აქტიურად უპირისპირდება სტიგმასა და დისკრიმინაციას, რომელიც თან ახლავს ამ პრობლემას და რომლის შედეგსაც განსაკუთრებით მძიმედ იმკიან ბავშვები.
2004 წელს პირველად ეწვია კამბოჯას, სადაც გაეცნო unicef-ის მიერ დაფინანსებულ ჰჳვ/აჳდS-ის მატარებელ და ნაღმზე აფეთქებულ ბავშვთა რეაბილიტაციასა და გათვითცნობიერების ამაღლებაზე მიმართულ პროექტებს. იმყოფებოდა ქალაქებში, რომლებიც ჯერ კიდევ დანაღმულია და დიდ საფრთხეს წარმოადგენს ადგილობრივი ბავშვებისა და მათი თემისათვის. ჩანი უშუალოდ შეხვდა HIV/AIDS-ის მატარებელ ბავშვებსა და ახალგაზრდებს.
2005 წლის იანვარში, ინდოეთის ოკეანის სანაპიროზე ცუნამის შემაძრწუნებელი კატასტროფის შემდეგ, ჩანმა პირადი წვლილი შეიტანა მისი შედეგების ლიკვიდაციის პროცესებში, ნახევარი მილიონი ჰონ-კონგის დოლარის ოდენობით (დაახლოებით 64 000 აშშ დოლარი) შემოწირულობა გაიღო.
კამბოჯაში დაბრუნებულმა, გააგრძელა ქვეყანაში არსებული ნაღმების შესახებ მოსახლეობის გათვითცნობიერების დონის ამაღლებაზე მიმართული კამპანია. ამ ვიზიტისას, მას თან ახლდა ოლიმპიური თამაშების ოქროს მედლის მფლობელი ედვინ მოსისი, რომელიც ადგილზე გაეცნო unicef-ის დახმარებით განხორციელებულ საგანმანათლებლო პროექტებს ნაღმების აღმოჩენისა და განაღმვის სფეროში.
ამავე მისიის ფარგლებში, ჩანი, unicef-თან ერთად, ეწვია ვიეტნამს, HIV/AIDS-ით ინფიცირებული ბავშვების მიმართ თანაგრძნობის გამოხატვის აუცილებლობის შესახებ ინფორმაციის გავრცელების მიზნით. იგი იმყოფებოდა ვიეტნამის ერთ-ერთ პროვინციაში, სადაც ჰჳვ-ით ინფიცირებულთა ყველაზე მაღალი მაჩვენებელია, პირადად ესაუბრა ბავშვებს და მათი ოჯახის წევრებს, რომლებიც „ემპათიის“ კლუბის რეგულარული წევრები არიან.
|